ಕರ್ನಾಟಕ ವಿಧಾನಸಭಾ ಚುನಾವಣೆ: ಬಸವಕಲ್ಯಾಣದಿಂದ ಯಾರಿಗೆ ಕಾಂಗ್ರೆಸ್​ ಟಿಕೆಟ್..?

ಕರ್ನಾಟಕ ವಿಧಾನಸಭಾ ಚುನಾವಣೆ ಘೋಷಣೆಗೆ ನಾಲ್ಕೇ ತಿಂಗಳು ಬಾಕಿ ಇರುವಂತೆ ಯಾವ ಪಕ್ಷದಿಂದ ಯಾವ ಕ್ಷೇತ್ರಕ್ಕೆ ಯಾರು ಅಭ್ಯರ್ಥಿಗಳು ಆಗಬಹುದು ಎಂಬ ಕುತೂಹಲ ಹಾಗೇ ಇದೆ.

ಮೂಲಗಳ ಪ್ರಕಾರ ಕಲ್ಯಾಣ ಕರ್ನಾಟಕದಲ್ಲಿ ಬರುವ ಬೀದರ್​ ಜಿಲ್ಲೆಯ ಐದು ವಿಧಾನಸಭಾ ಕ್ಷೇತ್ರಗಳಿಗೆ ಕಾಂಗ್ರೆಸ್​ ಪಕ್ಷದಿಂದ ಉಮೇದುವಾರರು ಬಹುತೇಕ ಅಂತಿಮ ಆಗಿದ್ದಾರೆ.

ಬಸವಕಲ್ಯಾಣದಿಂದ ಯಾರಿಗೆ ಟಿಕೆಟ್​..?

ಬಸವಕಲ್ಯಾಣದಿಂದ ಮಾಜಿ ವಿಧಾನಪರಿಷತ್​ ಸದಸ್ಯ, ಮಾಜಿ ಮುಖ್ಯಮಂತ್ರಿ ಧರಂ ಸಿಂಗ್​ ಅವರ ಪುತ್ರ ವಿಜಯ್​ ಸಿಂಗ್​ ಅವರಿಗೆ ಟಿಕೆಟ್​ ಸಿಗುವ ನಿರೀಕ್ಷೆ ನಿಚ್ಚಳವಾಗಿದೆ. ತಮಗೆ ಟಿಕೆಟ್​ ಪಕ್ಕಾ ಆಗಿದೆ ಎಂದು ವಿಜಯ್​ ಸಿಂಗ್​ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಇವರ ಕಿರಿಯ ಸಹೋದರ ಅಜಯ್​ ಸಿಂಗ್​ ಜೇವರ್ಗಿ ಕ್ಷೇತ್ರದ ಶಾಸಕರು

2018ರಲ್ಲಿ ಬಸವಕಲ್ಯಾಣದಿಂದ ನಾರಾಯಣರಾವ್​ ಅವರು ಗೆದ್ದು ಕಾಂಗ್ರೆಸ್​ ಶಾಸಕರಾಗಿದ್ದರು. ನಾರಾಯಣರಾವ್​ ಅವರ ನಿಧನದಿಂದ 2021ರಲ್ಲಿ ನಡೆದಿದ್ದ ಉಪ ಚುನಾವಣೆಯಲ್ಲಿ ವಿಜಯ್​ ಸಿಂಗ್​ ಟಿಕೆಟ್​ ಆಕಾಂಕ್ಷಿಯಾಗಿದ್ದರೂ ಅವರ ಬದಲು ನಾರಾಯಣರಾವ್​ ಅವರ ಪತ್ನಿ ಮಾಲಾ ನಾರಾಯಣರಾವ್​ ಅವರಿಗೆ ಟಿಕೆಟ್​ ಸಿಕ್ಕಿತ್ತು.

ತಮಗೆ ಟಿಕೆಟ್​ ಸಿಗದಿದ್ದ ಹಿನ್ನೆಲೆಯಲ್ಲಿ ವಿಜಯ್​ ಸಿಂಗ್​ ಅವರು ಮುನಿಸಿಕೊಂಡಿದ್ದರು. ಉಪ ಚುನಾವಣೆಯ ಪ್ರಚಾರದಿಂದಲೂ ದೂರ ಉಳಿದಿದ್ದರು.

ಆದರೆ ಉಪ ಚುನಾವಣೆಯಲ್ಲಿ ಮಾಲಾ ನಾರಾಯಣರಾವ್​ ಸೋತು ಬಿಜೆಪಿ ಪಕ್ಷದಿಂ ಶರಣು ಸಲಗಾರ್​ ವಿಧಾನಸಭೆಗೆ ಆಯ್ಕೆ ಆಗಿದ್ದರು.

ವಿಜಯ್​ ಸಿಂಗ್​ ಅವರು ಕೆಪಿಸಿಸಿ ಅಧ್ಯಕ್ಷ ಡಿ ಕೆ ಶಿವಕುಮಾರ್​ ಅವರ ಪಾಳಯದಲ್ಲಿ ಗುರುತಿಸಿಕೊಂಡಿದ್ದಾರೆ.

2018ರಲ್ಲಿ 35 ವರ್ಷಗಳ ಬಳಿಕ ಈ ಕ್ಷೇತ್ರದಲ್ಲಿ ಕಾಂಗ್ರೆಸ್​ ಗೆದ್ದಿತ್ತಾದರೂ ಉಪ ಚುನಾವಣೆಯಲ್ಲಿ ಸೋತಿತ್ತು.

ಈ ಕ್ಷೇತ್ರದಲ್ಲಿ ಮರಾಠ, ಲಿಂಗಾಯತ ಮತ್ತು ಮುಸ್ಲಿಂ ಮತಗಳು ಅಧಿಕವಾಗಿವೆ.