Electric Vehicles: ಕೇಂದ್ರ ಸರ್ಕಾರದಿಂದ ಸಬ್ಸಿಡಿ ಕೊನೆಯಾಗುವ ಸಾಧ್ಯತೆ

ವಿದ್ಯುತ್​ ಚಾಲಿತ ವಾಹನಗಳಿಗೆ (Electric Vehicles) ಕೇಂದ್ರ ಸರ್ಕಾರ ತಾನು ನೀಡುತ್ತಿದ್ದ ಸಬ್ಸಿಡಿ ಕೊನೆಯಾಗುವ ಸಾಧ್ಯತೆ ಇದೆ.  ಸಬ್ಸಿಡಿ ಅಂತ್ಯಗೊಳಿಸುವ ಬಗ್ಗೆ ಕೇಂದ್ರ ಹಣಕಾಸು ಸಚಿವಾಲಯ ಆಲೋಚನೆ ಮಾಡುತ್ತಿದೆ.

2019ರ ಬಜೆಟ್​ನಲ್ಲಿ ಪ್ರಧಾನಿ ನರೇಂದ್ರ ಮೋದಿ ಸರ್ಕಾರ ಫೇಮ್​-2 ಯೋಜನೆಯಡಿಯಲ್ಲಿ (Faster Adoption and Manufacturing of Hybrid and Electric Vehicles (FAME II) ವಿದ್ಯುತ್​ ಚಾಲಿತ ವಾಹನಗಳಿಗೆ ಸಬ್ಸಿಡಿ ನೀಡುವ ಘೋಷಣೆ ಮಾಡಿತ್ತು. ಏಪ್ರಿಲ್​ 1ರಿಂದ ಜಾರಿಯಾದ ಯೋಜನೆಗೆ ಐದು ವರ್ಷದ ಅವಧಿಗೆ 10 ಸಾವಿರ ಕೋಟಿ ರೂಪಾಯಿ ಮೀಸಲಿಡಲಾಗಿತ್ತು. ಈ ಯೋಜನೆಯ ಐದು ವರ್ಷದ ಅವಧಿ ಮುಂದಿನ ವರ್ಷದ ಮಾರ್ಚ್​ 31ರಂದು ಕೊನೆಯಾಗಲಿದೆ.

ಈ ಯೋಜನೆಯಡಿಯಲ್ಲಿ ವಿದ್ಯುತ್​ ಚಾಲಿತ ಕಾರು, ಆಟೋ, ದ್ವಿಚಕ್ರ ವಾಹನಗಳಿಗೆ ಖರೀದಿ ವೇಳೆ ಕೇಂದ್ರ ಸರ್ಕಾರ ಸಬ್ಸಿಡಿ ನೀಡುತ್ತಿದೆ.

ಇದೇ ವರ್ಷದ ಜೂನ್​ನಲ್ಲಿ ಕೇಂದ್ರ ಸರ್ಕಾರ ವಿದ್ಯುತ್​ ಚಾಲಿತ ದ್ವಿಚಕ್ರ ವಾಹನಗಳ (electric two-wheeler) ಖರೀದಿಗೆ ನೀಡುತ್ತಿದ್ದ ಸಬ್ಸಿಡಿ ಮೊತ್ತವನ್ನು ಶೇಕಡಾ 40ರಿಂದ ಶೇಕಡಾ 15ಕ್ಕೆ ಇಳಿಸಿತ್ತು. ಕಿಲೋವ್ಯಾಟ್​ ಸಾಮರ್ಥ್ಯದ ದ್ವಿಚಕ್ರ ವಾಹನಗಳಿಗೆ ನೀಡುತ್ತಿದ್ದ ಸಬ್ಸಿಡಿಯನ್ನು 10 ಸಾವಿರ ರೂಪಾಯಿಗೆ ಇಳಿಸಿತ್ತು.

ಸಬ್ಸಿಡಿ ಕಡಿತದ ಬಳಿಕ ವಿದ್ಯುತ್​ ಚಾಲಿತ ಬೈಕ್​ಗಳ (electric two-wheeler) ಮಾರಾಟ ಇಳಿಕೆಯಾಗಿತ್ತಾದರೂ ಈಗ ಮಾರಾಟ ಏರಿಕೆ ಆಗಿರುವ ಕಾರಣ ಸರ್ಕಾರ ಸಬ್ಸಿಡಿ ಯೋಜನೆ ಮುಂದುವರೆಸದಿರುವ ಬಗ್ಗೆ ಆಲೋಚನೆ ಮಾಡುತ್ತಿದೆ.