BREAKING: ಅದಾನಿಗೆ ಆಘಾತ: 5,400 ಕೋಟಿ ರೂಪಾಯಿ ಮೊತ್ತದ ದೊಡ್ಡ ಟೆಂಡರ್​ ರದ್ದು

ಅಕ್ರಮಗಳ ಆರೋಪಗಳ ಹಿನ್ನೆಲೆಯಲ್ಲಿ ಷೇರು ಮಾರುಕಟ್ಟೆಯಲ್ಲಿ ಗೌತಮ್​ ಅದಾನಿ ಕಂಪನಿಯ ಷೇರುಗಳು ಪಾತಾಳಕ್ಕೆ ಕುಸಿಯುತ್ತಿರುವ ಹೊತ್ತಲ್ಲೇ ಉತ್ತರಪ್ರದೇಶದಲ್ಲಿರುವ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್​ ಸರ್ಕಾರ ಅದಾನಿ ಕಂಪನಿಗೆ ಆಘಾತ ನೀಡಿದೆ.

ಉತ್ತರಪ್ರದೇಶದ ಬಿಜೆಪಿ ಸರ್ಕಾರ ಗುಜರಾತ್​ ಮೂಲದ ಉದ್ಯಮಿಯ ಕಂಪನಿ ಸಲ್ಲಿಕೆ ಮಾಡಿದ್ದ 5,400 ಕೋಟಿ ರೂಪಾಯಿ ಮೊತ್ತದ ಸ್ಮಾರ್ಟ್​​ ಮೀಟರ್​ ಪೂರೈಕೆ ಟೆಂಡರ್​ನ್ನು ರದ್ದುಪಡಿಸಿದೆ.

ಅದಾನಿ ಕಂಪನಿ ಉತ್ತರಪ್ರದೇಶದ ವಿದ್ಯುತ್​ ಸರಬರಾಜು ಕಂಪನಿಗಳಿಗೆ 75 ಲಕ್ಷ ಸ್ಮಾರ್ಟ್​ ಮೀಟರ್​ಗಳ ಪೂರೈಕೆಗೆ ಬಿಡ್​​ ಸಲ್ಲಿಸಿತ್ತು. 

ಆದರೆ ಆ ಬಿಡ್​​ನ್ನು ಉತ್ತರಪ್ರದೇಶದ ಸರ್ಕಾರಿ ಸ್ವಾಮ್ಯದ ವಿದ್ಯುತ್​ ಸರಬರಾಜು ಕಂಪನಿ ಮಧ್ಯಾಂಚಲ ವಿದ್ಯುತ್​ ನಿಗಮ ಲಿಮಿಟೆಡ್​ ರದ್ದುಗೊಳಿಸಿದೆ.

ಉತ್ತರಪ್ರದೇಶದಲ್ಲಿ ನಾಲ್ಕು ಎಸ್ಕಾಂಗಳಿವೆ. ಮಧ್ಯಾಂಚಲ, ದಕ್ಷಿಣಾಂಚಲ, ಪೂರ್ವಾಂಚಲ, ಪಶ್ಚಿಮಾಂಚಲ.

ಈ ನಾಲ್ಕು ಎಸ್ಕಾಂಗಳಿಗೆ ಪೂರೈಕೆ ಮಾಡಬೇಕಾಗಿರುವ ಸ್ಮಾರ್ಟ್​ ಮೀಟರ್​ಗಳ ಸಂಖ್ಯೆ 2.5 ಕೋಟಿ, ಒಟ್ಟು ಮೊತ್ತ 25 ಸಾವಿರ ಕೋಟಿ ರೂಪಾಯಿ. ಅಂದರೆ ಪ್ರತಿ ಮೀಟರ್​​ ಅಳವಡಿಕೆಗೆ 6 ಸಾವಿರ ರೂಪಾಯಿ ವೆಚ್ಚ ತಗುಲಿದೆ.

 ಸ್ಮಾರ್ಟ್​ ಮೀಟರ್​ಗಳ ಪೂರೈಕೆಗೆ ದುಬಾರಿ ವೆಚ್ಚವನ್ನು ಟೆಂಡರ್​ ವೇಳೆ ಸಲ್ಲಿಕೆ ಮಾಡಲಾಗಿದೆ ಎಂದು ಉತ್ತರಪ್ರದೇಶ ವಿದ್ಯುತ್​ ಬಳಕೆದಾರರ ವೇದಿಕೆ ಉತ್ತರಪ್ರದೇಶ ವಿದುಚ್ಛಕ್ತಿ ನಿಯಂತ್ರಣ ಆಯೋಗಕ್ಕೆ ದೂರು ನೀಡಿತ್ತು.