ನಟ ದರ್ಶನ್​ಗೆ ಚಪ್ಪಲಿ ಎಸೆತ – ಆ ರಾಜಕಾರಣಿಯದ್ದೇ ಕುಮ್ಮಕ್ಕ..?

ಚಾಲೆಂಜಿಂಗ್​ ಸ್ಟಾರ್​ ದರ್ಶನ್​ ಅವರ ಮೇಲೆ ವಿಜಯನಗರ ಜಿಲ್ಲೆಯ ಹೊಸಪೇಟೆಯಲ್ಲಿ ಕಿಡಿಗೇಡಿಯೊಬ್ಬ ಚಪ್ಪಲಿ ಎಸೆದಿದ್ದಾನೆ.
ತಪ್ಪೇನೂ ಇಲ್ಲ ಚಿನ್ನ, ಪರ್ವಾಗಿಲ್ಲ ಎನ್ನುವ ಮೂಲಕ ದರ್ಶನ್​ ಮೇಲೆ ಚಪ್ಪಲಿ ಎಸೆದವನಿಗೂ ಒಳ್ಳೆದು ಬಯಸಿ ದೊಡ್ಡತನ ಮೆರೆದಿದ್ದಾರೆ.
ಆದರೆ ಹೊಸಪೇಟೆಯಲ್ಲಿ ನಡೆದ ಈ ಚಪ್ಪಲಿ ಎಸೆತ ಹಿಂದಿನ ಕೃತ್ಯದ ರೂವಾರಿಗಳು ಯಾರು..? ದರ್ಶನ್​ ಅವರ ಮೇಲೆ ಚಪ್ಪಲಿ ಎಸೆಯುವಷ್ಟು ನಂಜು ದರ್ಶನ್​ ಅವರ ಮೇಲೆ ಅವರಿಗೇನಿತ್ತು..?
ಅಪ್ಪು ಪುತ್ಥಳಿಯ ಬಳಿಯೇ ಚಪ್ಪಲಿ ಎಸೆತ:
ಇದೇ ವರ್ಷದ ಜೂನ್​ ಮೊದಲ ವಾರದಲ್ಲಿ ಪ್ರವಾಸೋದ್ಯಮ ಸಚಿವ ಆನಂದ್​ ಸಿಂಗ್​ ಅವರು ಪ್ರತಿನಿಧಿಸುವ ವಿಧಾನಸಭಾ ಕ್ಷೇತ್ರ ಹೊಸಪೇಟೆಯಲ್ಲಿ ಪವರ್​ ಸ್ಟಾರ್​ ಪುನೀತ್​ ರಾಜ್​ಕುಮಾರ್​ ಅವರ 7.4 ಅಡಿ ಎತ್ತರದ ಕಂಚಿನ ಪುತ್ಥಳಿಯನ್ನು ಅನಾವರಣ ಮಾಡಲಾಗಿತ್ತು.
ಈ ಪುತ್ಥಳಿ ಅನಾವರಣ ಕಾರ್ಯಕ್ರಮದಲ್ಲಿ ಸಚಿವ ಆನಂದ್​ ಸಿಂಗ್​, ರಾಘವೇಂದ್ರ ರಾಜ್​ಕುಮಾರ್​, ಸಿನಿಮಾ ರಂಗದ ಗಣ್ಯರು ಮತ್ತು ಇತರೆ ರಾಜಕೀಯ ನಾಯಕರು ಭಾಗವಹಿಸಿದ್ದರು.
ಈ ಪುತ್ಥಳಿ ಅನಾವರಣದ ಬಳಿಕ ಹೊಸಪೇಟೆ ನಗರದ ಬಹುತೇಕ ಎಲ್ಲ ಕಡೆ ಅಪ್ಪು ಅವರ ಬೃಹತ್​ ಪೋಸ್ಟರ್​​ ಮತ್ತು ಕಟೌಟ್​ಗಳನ್ನೇ ಹಾಕಲಾಗಿತ್ತು.
ಆದರೆ ಹೊಸಪೇಟೆಯಲ್ಲಿ ಚಾಲೆಂಜಿಂಗ್​ ಸ್ಟಾರ್​ ಅವರ ಕ್ರಾಂತಿ ಸಿನಿಮಾದ ಬೊಂಬೆ ಬೊಂಬೆ ಹಾಡಿನ ಬಿಡುಗಡೆಯ ಹಿನ್ನೆಲೆಯಲ್ಲಿ ಡಿಬಾಸ್​ ಅಭಿಮಾನಿಗಳು ಅಪ್ಪು ಅವರ ಪೋಸ್ಟರ್​ ತೆಗೆದು ಡಿಬಾಸ್​ ಪೋಸ್ಟರ್​​ನ್ನು ಹಾಕಿದ್ದರು ಎಂಬ ಕಾರಣಕ್ಕೂ ಇಬ್ಬರೂ ನಟರ ಅಭಿಮಾನಿಗಳ ನಡುವೆ ಸಂಘರ್ಷವೂ ಆಗಿತ್ತು.
ಹಾಡಿನ ಬಿಡುಗಡೆ ಆರಂಭಕ್ಕೂ ಮುನ್ನ ದರ್ಶನ್​ ಅವರು ಅಪ್ಪು ಅವರ ಕಂಚಿನ ಪುತ್ಥಳಿಗೆ ಮಾಲಾರ್ಪಣೆಯನ್ನು ಮಾಡಿ ಗೌರವ ಸಲ್ಲಿಸಿದ್ದರು.
ಆದರೆ ಬಳಿಕ ಪುತ್ಥಳಿ ಸಮೀಪದಲ್ಲೇ ಇರುವ ಕಾರ್ಯಕ್ರಮದ ವೇದಿಕೆ ಏರುತ್ತಿದ್ದಂತೆ ಕಿಡಿಗೇಡಿಯೊಬ್ಬ ಚಪ್ಪಲಿ ಎಸೆದಿದ್ದಾನೆ.
ಸಚಿವ ಆನಂದ್​ ಸಿಂಗ್​ ಬೆಂಬಲಿಗರ ಕೃತ್ಯವೇ..?
ನಟ ದರ್ಶನ್​ ಅವರ ಅಭಿಮಾನಿಗಳು ಇದು ಹೊಸಪೇಟೆ ಶಾಸಕ ಆನಂದ್​ ಸಿಂಗ್​ ಅವರ ಕಡೆಯವರ ಕೃತ್ಯ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಆಕ್ರೋಶ ಹೊರಹಾಕಿದ್ದಾರೆ. ಹೊಸಪೇಟೆ ಶಾಸಕರು ತಮ್ಮ ಕಡೆಯವರನ್ನು ಕಳುಹಿಸಿ ಈ ಕೃತ್ಯ ಎಸಗಿದ್ದಾರೆ ಎಂದು ಡಿಬಾಸ್​ ಅಭಿಮಾನಿಗಳು ಸೋಷಿಯಲ್​ ಮೀಡಿಯಾ ಪೇಜ್​ಗಳಲ್ಲಿ ಬರೆದುಕೊಂಡಿದ್ದಾರೆ.
ಹೊಸಪೇಟೆಗೆ ಬಂದಾಗ ಕೆಲವು ರಾಜಕಾರಣಿಗಳ ಕುಮ್ಮಕ್ಕಿನಿಂದ ಕೆಲವು ನಟರ ಅಭಿಮಾನಿಗಳೆಂಬ ಹೆಸರಲ್ಲಿ ಹೇಡಿಗಳು ಕೊಲೆಯತ್ನ ಮತ್ತು ಗುಂಪಿನ ಮಧ್ಯೆ ಚಪ್ಪಲಿ ಎಸೆಯುವ ಕೆಳಮಟ್ಟಕ್ಕೆ ಇಳಿದ ಪ್ರವೃತ್ತಿ ಇಂದು ಬೆಳಕಿಗೆ ಬಂದಿದೆ
ಎಂದು ಡಿಬಾಸ್​ ಅವರ ಅಭಿಮಾನಿಗಳ ಅಧಿಕೃತ ಫೇಸ್​ಬುಕ್​ ಖಾತೆಯಲ್ಲಿ ಬರೆಯಲಾಗಿದೆ.

LEAVE A REPLY

Please enter your comment!
Please enter your name here