ಕರ್ನಾಟಕ ರಸ್ತೆ ಸಾರಿಗೆ ನಿಗಮ (ಕೆಎಸ್ಆರ್ಟಿಸಿ) ಬಸ್ ಪ್ರಯಾಣ ದರವನ್ನು ಗಣನೀಯ ಪ್ರಮಾಣದಲ್ಲಿ ಏರಿಕೆ ಮಾಡಿದೆ.
ರಜಾ ದಿನಗಳು ಮತ್ತು ವಾರಾಂತ್ಯದಲ್ಲಿ ನಗರಗಳ ನಡುವೆ ಸಂಚರಿಸುವ ಕೆಎಸ್ಆರ್ಟಿಸಿ ನಾನ್ ಎಸಿ ಸ್ಲೀಪರ್ ಮತ್ತು ರಾಜಹಂಸ ಬಸ್ಗಳಲ್ಲಿ ಪ್ರಯಾಣ ದರ ಭಾರೀ ಏರಿಕೆ ಕಂಡಿದೆ.
ಉದಾಹರಣೆ 1:
ಬೆಂಗಳೂರಿಂದ ಕಾರ್ಕಳಕ್ಕೆ ಸಂಚರಿಸುವ ನಾನ್ ಎಸಿ ಸ್ಲೀಪರ್ ಬಸ್ ಪ್ರಯಾಣ ದರ 835 ರೂಪಾಯಿಗೆ ಹೆಚ್ಚಳವಾಗಿದೆ. ಕಳೆದ ವರ್ಷ ಏಪ್ರಿಲ್ನಲ್ಲಿ ಈ ದರ 778 ರೂಪಾಯಿ ಇತ್ತು. ಅಂದರೆ 57 ರೂಪಾಯಿ ಏರಿಕೆಯಾಗಿದೆ.
ಉದಾಹರಣೆ 2:
ಇದೇ ಮಾರ್ಗದಲ್ಲಿ ವಾರಾಂತ್ಯ ಅಂದರೆ ಶುಕ್ರವಾರ ಮತ್ತು ಶನಿವಾರ ಪ್ರಯಾಣಿಸುವರು ಮತ್ತು ರಜಾ ದಿನಗಳಲ್ಲಿ ಪ್ರಯಾಣಿಸುವವರು 900 ರೂಪಾಯಿಗಿಂತಲೂ ಹೆಚ್ಚು ಹಣ ಪಾವತಿಸಬೇಕು.
ಏಪ್ರಿಲ್ 14ರಂದು ಅಂಬೇಡ್ಕರ್ ಜಯಂತಿ, ಸರ್ಕಾರಿ ರಜಾ ದಿನ. ಈ ಹಿನ್ನೆಲೆಯಲ್ಲಿ ಹಿಂದಿನ ದಿನ ಪ್ರಯಾಣಿಸುವವರ ಸಂಖ್ಯೆ ಹೆಚ್ಚಳ.
ಈ ಹಿನ್ನೆಲೆಯಲ್ಲಿ ಏಪ್ರಿಲ್ 13ರ ಗುರುವಾರ ಕೆಎಸ್ಆರ್ಟಿಸಿ ನಾನ್ ಎಸಿ ಸ್ಲೀಪರ್ ಪ್ರಯಾಣ ದರವನ್ನು ಬರೋಬ್ಬರೀ 992 ರೂಪಾಯಿಗೆ ಹೆಚ್ಚಿಸಿದೆ. ಅಂದರೆ ವಾರದ ಇತರೆ ದಿನಗಳಿಗೆ ಹೋಲಿಸಿದರೆ 157 ರೂ. ಹೆಚ್ಚಳ.
ಉದಾಹರಣೆ 3:
ಏಪ್ರಿಲ್ 21 ಶುಕ್ರವಾರ. ಈ ದಿನ ನಾನ್ ಎಸಿ ಸ್ಲೀಪರ್ ಟಿಕೆಟ್ ದರ 992 ರೂಪಾಯಿ.
ಒಂದೇ ವರ್ಷದಲ್ಲಿ ಭಾರೀ ಹೆಚ್ಚಳ:
ಕಳೆದ ವರ್ಷ ಏಪ್ರಿಲ್ ವೇಳೆಗೆ ಕೆಎಸ್ಆರ್ಟಿಸಿ ನಾನ್ ಎಸಿ ಸ್ಲೀಪರ್ ದರ ವಾರದ ದಿನಗಳಲ್ಲಿ (ರಜಾ ದಿನಗಳ ಹಿಂದಿನ ದಿನ ಹೊರತುಪಡಿಸಿ) 648ರಿಂದ 778 ರೂಪಾಯಿಗೆ ಅಂದರೆ 130 ರೂಪಾಯಿ ಹೆಚ್ಚಳ ಆಗಿತ್ತು.
ಶುಕ್ರವಾರದ ಪ್ರಯಾಣಕ್ಕೆ 852 ರೂಪಾಯಿ ಕೊಡ್ಬೇಕಿತ್ತು. ಈಗ ಈ ದರ 992 ರೂಪಾಯಿಗೆ ಏರಿಕೆ ಆಗಿದೆ.
ಅಂದರೆ ವಾರದ ದಿನಗಳಲ್ಲಿ ನಾನ್ ಎಸಿ ಸ್ಲೀಪರ್ಗೆ 187 ರೂಪಾಯಿ, ರಜೆ ಮತ್ತು ವಾರಾಂತ್ಯಕ್ಕೆ ಟಿಕೆಟ್ ದರ 344 ರೂಪಾಯಿ ಹೆಚ್ಚಳ ಆಗಿದೆ.
ರಾಜಹಂಸ ಟಿಕೆಟ್ ದರವೂ ಹೆಚ್ಚಳ:
ಇತ್ತ ರಾಜಹಂಸ ಟಿಕೆಟ್ ದರವೂ ಭಾರೀ ಹೆಚ್ಚಳವಾಗಿದೆ. ವಾರಾಂತ್ಯ ಮತ್ತು ರಜಾ ದಿನಗಳಲ್ಲಿ ರಾಜಹಂಸ ಟಿಕೆಟ್ ದರ ಬೆಂಗಳೂರು-ಕಾರ್ಕಳ ಮಾರ್ಗದಲ್ಲಿ 857 ರೂಪಾಯಿ ಆಗಿದೆ. ವಾರದ ದಿನಗಳಲ್ಲಿ 751 ರೂಪಾಯಿ ಆಗಿದೆ.
ಕಳೆದ ವರ್ಷ ಈ ದರ ಕ್ರಮವಾಗಿ 715 ರೂಪಾಯಿ ಮತ್ತು 778 ರೂಪಾಯಿಗೆ ಹೆಚ್ಚಳವಾಗಿತ್ತು.
ಅದಕ್ಕೂ ಮೊದಲು ರಾಜಹಂಸ ಟಿಕೆಟ್ ದರ ಈ ಮಾರ್ಗದಲ್ಲಿ 653 ರೂಪಾಯಿ ಇತ್ತು.
ಖಾಸಗಿ ಬಸ್‌ಗಳು ದುಬಾರಿ ಎಂಬ ಕಾರಣಕ್ಕೆ ದೂರ ಊರಿನ ಪ್ರಯಾಣಿಕರು ಕೆಎಸ್ಆರ್ಟಿಸಿ ನಾನ್ ಎಸಿ ಸ್ಲೀಪರ್ ಕಡೆ ಮುಖ ಮಾಡಿದ್ದರು. ಅಗ್ಗದ ಪ್ರಯಾಣ ಮತ್ತು ಸುರಕ್ಷಿತ ಪ್ರಯಾಣ ಎಂಬ ಕಾರಣಕ್ಕೆ ಕೆಎಸ್‌ಆರ್‌ಟಿಸಿಗೆ ಪ್ರಯಾಣಿಕರು ಹೆಚ್ಚಾದರು.
ಆದರೆ ಈ ಹೆಚ್ಚಳವನ್ನೇ ದಾಳವಾಗಿ ಬಳಸಿಕೊಂಡಿರುವ ಕೆಎಸ್ಆರ್ಟಿಸಿ ಈಗ ಖಾಸಗಿ ಬಸ್ಗಳಂತೆ ದರ ಏರಿಸಿ ಪ್ರಯಾಣಿಕರಿಗೆ ಆಘಾತ ನೀಡಿದೆ.
