HPCLನಲ್ಲಿ MRPL ವಿಲೀನ ಬಗ್ಗೆ ಕೇಂದ್ರ ಸರ್ಕಾರದ ಆಲೋಚನೆ

ಹಿಂದೂಸ್ತಾನ್​ ಪೆಟ್ರೋಲಿಯಂ ಕಾರ್ಪೋರೇಷನ್​ ಲಿಮಿಟೆಡ್​ (HPCL​) ಜೊತೆಗೆ ಮಂಗಳೂರು ರಿಫೈನರಿ​ ಪೆಟ್ರೋ ಕೆಮಿಕಲ್ಸ್ ಲಿಮಿಟೆಡ್​ (MRPL​)ನ್ನು ವಿಲೀನ ಮಾಡುವ ಬಗ್ಗೆ ಕೇಂದ್ರ ಸರ್ಕಾರ ಯೋಚಿಸುತ್ತಿದೆ ಎಂದು ಪ್ರಮುಖ ಇಂಗ್ಲೀಷ್​ ದೈನಿಕ ಎಕಾನಮಿಕ್​ ಟೈಮ್ಸ್​ ವರದಿ ಮಾಡಿದೆ.

ವಿಲೀನದ ಬಗ್ಗೆ ಕೇಂದ್ರ ಇಂಧನ ಸಚಿವಾಲಯ ಪ್ರಸ್ತಾಪವೊಂದನ್ನು ಸಿದ್ಧಪಡಿಸುತ್ತಿದೆ ಎಂದು ಪತ್ರಿಕೆ ವರದಿ ಮಾಡಿದೆ.

ಹೆಚ್​ಪಿಸಿಎಲ್​ ಮತ್ತು ಎಂಆರ್​ಪಿಎಲ್​ ಎರಡೂ ಕಂಪನಿಗಳು ತೈಲ ಮತ್ತು ಅನಿಲ ನಿಗಮ (ONGC) ಇದರ ಸಹವರ್ತಿ ಕಂಪನಿಗಳು.

ಎಂಆರ್​ಪಿಎಲ್​ನಲ್ಲಿ ಒಎನ್​ಜಿಸಿ ಶೇಕಡಾ 71.63ರಷ್ಟು ಪಾಲು ಹೊಂದಿದ್ದರೆ, ಹೆಚ್​ಪಿಸಿಎಲ್​ ಶೇಕಡಾ 16.96ರಷ್ಟು ಶೇರು ಹೊಂದಿದೆ. ಎಂಅರ್​ಪಿಎಲ್​ನಲ್ಲಿರುವ ಸಾರ್ವಜನಿಕ ಷೇರು ಶೇಕಡಾ 11.42.

ಐದು ವರ್ಷಗಳ ಹಿಂದೆಯಷ್ಟೇ ಹೆಚ್​ಪಿಸಿಎಲ್​ನ್ನು ಒಎನ್​ಜಿಸಿ ಸ್ವಾಧೀನಪಡಿಸಿಕೊಂಡಿತ್ತು.

ಆದರೆ ಹೆಚ್​ಪಿಸಿಎಲ್​ ಮತ್ತು ಎಂಆರ್​ಪಿಎಲ್​ ವಿಲೀನಕ್ಕೆ ಮುಂದಿನ ವರ್ಷದವರೆಗೂ ಕಾಯಬೇಕಾಗಬಹುದು. ಕಾರಣ ಕಳೆದ ವರ್ಷವಷ್ಟೇ ಎಂಆರ್​ಪಿಎಲ್​ನಲ್ಲಿ ಒಎಂಪಿಎಲ್​ ವಿಲೀನವಾಗಿತ್ತು. ನಿಯಮಗಳ ಪ್ರಕಾರ ವಿಲೀನ ಮಾಡಿಕೊಂಡ ಕಂಪನಿ ಇನ್ನೊಂದು ಕಂಪನಿ ಜೊತೆಗೆ ವಿಲೀನ ಆಗಲು 2 ವರ್ಷದ ಅಂತರ ಕಡ್ಡಾಯ.

ಹೆಚ್​ಪಿಸಿಎಲ್​​ನಲ್ಲಿ ಎಂಆರ್​ಪಿಎಲ್​ ವಿಲೀನದಿಂದ ಎಂಆರ್​ಪಿಎಲ್​ ಕರ್ನಾಟಕದ ಹೊರಗೆ ಮಾರುವ ತೈಲೋತ್ಪನ್ನಗಳ ಮೇಲೆ ಹಾಕಲಾಗುವ ಕೇಂದ್ರ ಮಾರಾಟ ತೆರಿಗೆಯನ್ನು ಉಳಿತಾಯ ಮಾಡಿಕೊಳ್ಳಬಹುದು ಎನ್ನುವುದು ವಿಲೀನದ ಹಿಂದಿನ ಪ್ರಮುಖ ಲೆಕ್ಕಾಚಾರ.