BJPಗೆ ಮಾಜಿ ಸಂಸದ ರಾಜೀನಾಮೆ, ಕಾಂಗ್ರೆಸ್​​ಗೆ ವಾಪಸ್​​

ತೆಲಂಗಾಣ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿಗೆ ಭಾರೀ ಆಘಾತವಾಗಿದೆ.

ಬಿಜೆಪಿ ಪಕ್ಷದ ಮಾಜಿ ಸಂಸದ ಡಾ ಜಿ ವಿವೇಕಾನಂದ (G. Vivekanand) ಅವರು ಬಿಜೆಪಿಗೆ ರಾಜೀನಾಮೆ ನೀಡಿದ್ದಾರೆ.

ಕೇಂದ್ರ ಸಚಿವರೂ ಆಗಿರುವ ತೆಲಂಗಾಣ ಬಿಜೆಪಿ ಅಧ್ಯಕ್ಷ ಕಿಶನ್​ ರೆಡ್ಡಿ ಅವರಿಗೆ ಸಲ್ಲಿಸಿರುವ ರಾಜೀನಾಮೆ ಪತ್ರದಲ್ಲಿ ಭಾರದ ಹೃದಯದೊಂದಿಗೆ ರಾಜೀನಾಮೆ ನೀಡುತ್ತಿರುವುದಾಗಿ ಹೇಳಿದ್ದಾರೆ.

ಜಿ ವಿವೇಕ್​ ವೆಂಕಟಸ್ವಾಮಿ ಎಂದೂ ಕರೆಯಲಾಗುವ ಈ ನಾಯಕ 2004 ಮತ್ತು 2009ರಲ್ಲಿ ತೆಲಂಗಾಣದ ಪೆಡಪಲ್ಲಿ ಲೋಕಸಭಾ ಕ್ಷೇತ್ರದಿಂದ ಕಾಂಗ್ರೆಸ್​ನಿಂದಲೇ ಗೆದ್ದು ಸಂಸದರಾಗಿದ್ದರು.

2019ರಲ್ಲಿ ಬಿಜೆಪಿ ಸೇರ್ಪಡೆಯಾಗಿದ್ದ ಇವರು ಈಗ ಮತ್ತೆ ಕಾಂಗ್ರೆಸ್​​ಗೆ ಮರಳುತ್ತಿದ್ದಾರೆ.

ಪರಿಶಿಷ್ಟ ಜಾತಿ ಸಮುದಾಯಕ್ಕೆ ಸೇರಿರುವ ಇವರು ವಿ6 ತೆಲುಗು ನ್ಯೂಸ್​ ಚಾನೆಲ್​ನ ಮಾಲೀಕರೂ ಹೌದು. ಹೈದ್ರಾಬಾದ್​ ಕ್ರಿಕೆಟ್​ ಸಂಘದ ಅಧ್ಯಕ್ಷರೂ ಆಗಿದ್ದರು.

ಪೆಡ್ಡಪಲ್ಲಿ ಲೋಕಸಭಾ ಕ್ಷೇತ್ರದಲ್ಲಿ 7 ವಿಧಾನಸಭಾ ಕ್ಷೇತ್ರಗಳಿದ್ದು ಮೂರು ಎಸ್​ಸಿ ಮೀಸಲು ಕ್ಷೇತ್ರಗಳಿವೆ. 7 ಕ್ಷೇತ್ರಗಳ ಪೈಕಿ 5ರಲ್ಲಿ ಬಿಆರ್​ಎಸ್​ ಮತ್ತು 2ರಲ್ಲಿ ಕಾಂಗ್ರೆಸ್​ ಗೆದ್ದಿತ್ತು.

ಜಿ ವಿವೇಕಾನಂದ ಅವರು ಕಾಂಗ್ರೆಸ್​​ಗೆ ಮತ್ತೆ ವಾಪಸ್​ ಆಗುತ್ತಿರುವುದು ಪಕ್ಷಕ್ಕೆ ದೊಡ್ಡ ಲಾಭ ತಂದುಕೊಡಲಿದೆ ಎಂದು ಭಾವಿಸಲಾಗಿದೆ.