BREAKING: ರಾಮಮಂದಿರ ನಿರ್ಮಾಣದ ಖರ್ಚು-ವೆಚ್ಚ ಭಾರೀ ಹೆಚ್ಚಳ

ಅಯೋಧ್ಯೆಯಲ್ಲಿ (Ayodya) ನಿರ್ಮಾಣ ಆಗುತ್ತಿರುವ ಭವ್ಯ ರಾಮಮಂದಿರದ (Ram Mandir) ನಿರ್ಮಾಣ ವೆಚ್ಚ ಎಷ್ಟು ಗೊತ್ತಾ..? ಅಂದಾಜು ಬರೋಬ್ಬರೀ 1,800 ಕೋಟಿ ರೂಪಾಯಿ.

1,800 ಕೋಟಿ ರೂಪಾಯಿ ಖರ್ಚಾಗಬಹುದು ಎಂದು ಶ್ರೀರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್​ ಅಂದಾಜಿಸಿದೆ. ಸುಪ್ರೀಂಕೋರ್ಟ್​ನ (Supreme Court) ತನ್ನ ಐತಿಹಾಸಿಕ ತೀರ್ಪಿನಲ್ಲಿ ರಾಮಮಂದಿರ ನಿರ್ಮಾಣಕ್ಕಾಗಿ ಟ್ರಸ್ಟ್​ ರಚಿಸುವಂತೆ ಸೂಚಿಸಿತ್ತು.

ಮುಂದಿನ ವರ್ಷದ ಅಂದರೆ 2023ರ ಡಿಸೆಂಬರ್​ ವೇಳೆಗೆ ರಾಮಮಂದಿರ ನಿರ್ಮಾಣ ಪೂರ್ಣಗೊಳ್ಳಲಿದೆ. 2024ರ ಜನವರಿಯಲ್ಲಿ ಮಕರ ಸಂಕ್ರಾಂತಿಯಂದು ರಾಮಮಂದಿರಲ್ಲಿ ಶ್ರೀರಾಮ (Sri Ram) ಆಸೀನನಾಗಲಿದ್ದಾನೆ.

ಆರಂಭದಲ್ಲಿ ರಾಮಮಂದಿರ ನಿರ್ಮಾಣದ ಖರ್ಚು 1 ಸಾವಿರ ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿತ್ತು. ಆದರೆ ಈಗ 1,800 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿದೆ. ಈ ಮೂಲಕ 800 ಕೋಟಿ ರೂಪಾಯಿ ಹೆಚ್ಚಳ ಆಗಿದೆ.

ಸದ್ಯದವರೆಗೂ ಮಂದಿರ ನಿರ್ಮಾಣಕ್ಕೆ 400 ಕೋಟಿ ರೂಪಾಯಿ ಖರ್ಚಾಗಿದೆ.

ಮಂದಿರ ನಿರ್ಮಾಣಕ್ಕೆ ಈಗಾಗಲೇ ಭಕ್ತರು ಟ್ರಸ್ಟ್​ಗೆ 5,500 ಕೋಟಿ ರೂಪಾಯಿ ದೇಣಿಗೆ ನೀಡಿದ್ದಾರೆ. ನಗದು ಮತ್ತು ಆನ್​ಲೈನ್​ ಮೂಲಕ ಪ್ರತಿ ದಿನ ಲಕ್ಷಾಂತರ ಮಂದಿ ರಾಮಮಂದಿರಕ್ಕಾಗಿ ದೇಣಿಗೆ ನೀಡುತ್ತಿದ್ದಾರೆ. ಆದರೆ ವಿದೇಶಗಳಲ್ಲಿರುವ ಭಕ್ತರಿಂದ ದೇಣಿಗೆ ಸ್ವೀಕರಿಸಲು ಟ್ರಸ್ಟ್​ಗೆ ಸದ್ಯಕ್ಕೆ ಸಾಧ್ಯವಾಗುತ್ತಿಲ್ಲ.

ರಾಮಮಂದಿರ ಆವರಣದಲ್ಲಿ ಋಷಿಗಳ ಮಂದಿರಗಳೂ ನಿರ್ಮಾಣ ಆಗಲಿವೆ. ಮಹರ್ಷಿ ವಾಲ್ಮೀಕಿ, ಮಹರ್ಷಿ ವಿಶ್ವಾಮಿತ್ರ, ಅನಸೂಯ, ನಿಷದರಾಜ, ಮಾತಾ ಶಬರಿ ಮತ್ತು ಜಟಾಯು ಪಕ್ಷಿಯ ಮಂದಿರ ನಿರ್ಮಾಣ ಆಗಲಿದೆ.

ರಾಮಮಂದಿರದಲ್ಲಿ 14 ದ್ವಾರಗಳು ನಿರ್ಮಾಣವಾಗಲಿವೆ. ಈ ದ್ವಾರಗಳ ಬಾಗಿಲಿಗೆ ಮಹಾರಾಷ್ಟ್ರದಿಂದ ಸಾಗುವಾನಿ ಮರವನ್ನು ಬಳಸಿಕೊಳ್ಳಲಾಗುತ್ತದೆ. ಆರಂಭದಲ್ಲಿ 13 ದ್ವಾರಗಳು ಇರಲಿವೆ. ರಾಮಲಲ್ಲಾನ ಮೂರ್ತಿ ಪ್ರತಿಷ್ಠಾಪಿಸಲಾಗುವ ರಾಮಲಲ್ಲಾ (Ramlalla) ದೊಡ್ಡ ದ್ವಾರದ ನಿರ್ಮಾಣವಾಗಲಿದೆ.