ಕೋವಿಡ್​ ಸಂದರ್ಭದಲ್ಲಿ ಕೊಟ್ಟಿದ್ದ ಖಾಸಗಿ Data Leak: ನಾಲ್ವರು ಅರೆಸ್ಟ್

ಕೋವಿಡ್ (Covid 19)​ ಸಂದರ್ಭದಲ್ಲಿ ಸಂಗ್ರಹಿಸಲಾಗಿದ್ದ  81 ಕೋಟಿ ಭಾರತೀಯರ ಖಾಸಗಿ ಮಾಹಿತಿಗಳನ್ನು (Data Leak) (ಆಧಾರ್​, ಮೊಬೈಲ್​ ಸಂಖ್ಯೆ ಇತ್ಯಾದಿ) ಕದ್ದು ಮಾರಾಟಕ್ಕಿಟ್ಟಿದ್ದ ಆರೋಪದಡಿಯಲ್ಲಿ ನಾಲ್ವರನ್ನು ಬಂಧಿಸಲಾಗಿದೆ.

ಒಡಿಶಾ ರಾಜ್ಯದ ಬಿ.ಟೆಕ್​ ಪದವೀಧರ, ಹರಿಯಾಣ ರಾಜ್ಯದ ಶಾಲೆ ಬಿಟ್ಟಿದ್ದ ಇಬ್ಬರು ಮತ್ತು ಉತ್ತರಪ್ರದೇಶದ ಝಾನ್ಸಿಯ ಓರ್ವನನ್ನು ದೆಹಲಿ ಪೊಲೀಸರು ಕಳೆದ ವಾರ ಬಂಧಿಸಿದ್ದಾರೆ. ಬಂಧಿತರನ್ನು 7 ದಿನಗಳವರೆಗೆ ಪೊಲೀಸ್​ ಕಸ್ಟಡಿಗೆ ಒಪ್ಪಿಸಲಾಗಿದೆ.

ಕೋವಿಡ್​ ಸಂದರ್ಭದಲ್ಲಿ ಭಾರತೀಯ ವೈದ್ಯಕೀಯ ಸಂಶೋಧನಾ ಸಂಸ್ಥೆ (ICMR) ವೆಬ್​​ಸೈಟ್​ನಿಂದ ಖಾಸಗಿ ಮಾಹಿತಿಗಳನ್ನು ಕದ್ದು ಡಾರ್ಕ್​ವೆಬ್​ನಲ್ಲಿ ಮಾರಾಟಕ್ಕೆ ಇಟ್ಟಿದ್ದರು.

ಆನ್​ಲೈನ್​ ಗೇಮಿಂಗ್​​ ಆಪ್​ (Online Gaming App) ಮೂಲಕ ಪರಿಚಿತರಾದ ಈ ನಾಲ್ವರೂ ಆ ಬಳಿಕ ಸುಲಭದಲ್ಲಿ ದುಡ್ಡು ಮಾಡುವುದುಕ್ಕೆ ಡಾಟಾ ಮಾಹಿತಿ ಕದ್ದು ಮಾರಾಟ ಮಾಡುವ ಸಂಚು ಮಾಡಿದ್ದರು.

81 ಕೋಟಿ ಭಾರತೀಯರ ಖಾಸಗಿ ಮಾಹಿತಿಗಳನ್ನು (ಆಧಾರ್​, ಮೊಬೈಲ್​ ಸಂಖ್ಯೆ, ಖಾಸಗಿ ಸಂಬಂಧಗಳ ಮಾಹಿತಿ, ಪ್ಯಾನ್​ ಸಂಖ್ಯೆ, ಪಾಸ್​ಪೋರ್ಟ್​ ಮಾಹಿತಿ, ವಿಳಾಸ) ಇತ್ಯಾದಿಗಳನ್ನು ಡಾರ್ಕ್​ವೆಬ್​ನಲ್ಲಿ ಮಾರಾಟಕ್ಕೆ ಇಡಲಾಗಿದೆ ಎಂದು ಅಮೆರಿಕದ ಸೈಬರ್​ಸೆಕ್ಯೂರಿಟಿ ಸಂಶೋಧನಾ ಸಂಸ್ಥೆ ರೆಸೆಕ್ಯೂರಿಟಿ ಇದೇ ಅಕ್ಟೋಬರ್​ನಲ್ಲಿ ವರದಿ ಪ್ರಕಟಿಸಿತ್ತು.