ಈ ಕೇಸ್​ ಸಾಬೀತಾದ್ರೆ ಪ್ರಜ್ವಲ್​ ರೇವಣ್ಣಗೆ ಜೀವಾವಧಿ ಶಿಕ್ಷೆ..! ಜೀವನಪರ್ಯಂತ ಜೈಲಿನಲ್ಲೇ..?

ದೇಶ ಬಿಟ್ಟು ಓಡಿಹೋಗಿರುವ ಜೆಡಿಎಸ್​ ವರಿಷ್ಠ, ಮಾಜಿ ಪ್ರಧಾನಿ ಹೆಚ್​ ಡಿ ದೇವೇಗೌಡರ ಮೊಮ್ಮಗ ಪ್ರಜ್ವಲ್​​ ರೇವಣ್ಣ ವಿರುದ್ಧ ಮೂರನೇ ಪ್ರಕರಣ ದಾಖಲಾಗಿದೆ.

ಈ ಮೂರನೇ ಪ್ರಕರಣದಲ್ಲಿ ಪ್ರಜ್ವಲ್​​​ ವಿರುದ್ಧ ಹಾಕಲಾಗಿರುವ ಸೆಕ್ಷನ್​ಗಳು ಜೆಡಿಎಸ್​ ಯುವ ನಾಯಕನ ರಾಜಕೀಯ ಜೀವನಕ್ಕೆ ಇತಿಶ್ರೀ ಹಾಡಿದರೂ ಅಚ್ಚರಿಯಿಲ್ಲ.

ಹೊಳೆನರಸೀಪುರದಲ್ಲಿರುವ ಹೆಚ್​ ಡಿ ರೇವಣ್ಣ ಮನೆಯಲ್ಲಿ ಕೆಲಸಕ್ಕಿದ್ದ 60 ವರ್ಷ ವಯಸ್ಸಿನ ಮಹಿಳೆ ನೀಡಿದ್ದ ಹೇಳಿಕೆ ಆಧರಿಸಿ ವಿಶೇಷ ತನಿಖಾ ತಂಡ ಎಫ್​ಐಆರ್​ ದಾಖಲಿಸಿದೆ.

ಐಪಿಸಿ ಕಲಂ 376 (2) (ಎನ್​) – ಮಹಿಳೆ ಮೇಲೆ ನಿರಂತರ ಅತ್ಯಾಚಾರ

ಐಪಿಸಿ ಕಲಂ 376 (2) (ಕೆ) – ಅಧಿಕಾರದಲ್ಲಿರುವ ವ್ಯಕ್ತಿಯಿಂದ ಅತ್ಯಾಚಾರ

ಐಪಿಸಿ 354 (ಎ) – ಲೈಂಗಿಕ ಕಿರುಕುಳ

ಐಪಿಸಿ 354 (ಬಿ) – ಮಹಿಳೆಯನ್ನು ಬಲವಂತವಾಗಿ ವಿವಸ್ತ್ರಗೊಳಿಸುವುದು

ಐಪಿಸಿ 354 (ಸಿ) – ಮಹಿಳೆಯನ್ನು ಬೆತ್ತಲೆಗೊಳಿಸಿ ಕಾಮತೃಷೆ ತೀರಿಸಿಕೊಳ್ಳುವುದು

ಇವುಗಳಲ್ಲಿ ಮೊದಲ ಎರಡು ಕಲಂಗಳಲ್ಲಿ ಎಸಗಲಾಗಿರುವ ಅಪರಾಧ ಸಾಬೀತಾದರೆ ಆಗ ಕನಿಷ್ಠ 10 ವರ್ಷ ಜೈಲು ಶಿಕ್ಷೆ ವಿಧಿಸಬೇಕಾಗುತ್ತದೆ. ಅಪರೂಪದ ಪ್ರಕರಣಗಳಲ್ಲಿ ಜೀವಾವಧಿ ಶಿಕ್ಷೆ ಆರೋಪ ಸಾಬೀತಾದ ಅಪರಾಧಿಯ ಜೀವಿತಾವಧಿವರೆಗೂ ಜೈಲಿನಲ್ಲೇ ಇರಬೇಕಾಗುತ್ತದೆ.

ಮೇ 4ರಂದು ಈ ಮಹಿಳೆಯನ್ನು ಮೈಸೂರು ಜಿಲ್ಲೆಯ ಕಲ್ಲೇನಹಳ್ಳಿಯಲ್ಲಿರುವ ತೋಟದ ಮನೆಯಿಂದ ರಕ್ಷಣೆ ಮಾಡಲಾಗಿತ್ತು.

ಬಳಿಕ ಈಕೆ ಬೆಂಗಳೂರಲ್ಲಿ ನ್ಯಾಯಾಧೀಶರ ಎದುರು ಹಾಜರಾಗಿ ಸಿಆರ್​ಪಿಸಿ 164ರಡಿಯಲ್ಲಿ ಹೇಳಿಕೆ ದಾಖಲಿಸಿದ್ದಾರೆ.

ಈ ಮಹಿಳೆಯನ್ನು ಅಪಹರಿಸಿದ ಆರೋಪದಡಿಯಲ್ಲಿ ಮಾಜಿ ಸಚಿವ ಹೆಚ್​ ಡಿ ರೇವಣ್ಣ ವಿರುದ್ಧ ಪ್ರಕರಣ ದಾಖಲಾಗಿ ಬಂಧನವೂ ಆಗಿದೆ.