ಅ(ಸ್ಪಿನ್) ಮಾಯಾಜಾಲ; ವಿಂಡೀಸ್ ವಿಲವಿಲ! ಭಾರತಕ್ಕೆ ಇನ್ನಿಂಗ್ಸ್ ಗೆಲುವು

ವಿಶ್ವ ಟೆಸ್ಟ್ ಚಾಂಪಿಯನ್​ಶಿಪ್​ (2023-25) ಸೈಕಲ್​ನಲ್ಲಿ ಟೀಂ ಇಂಡಿಯಾಗೆ ಅದ್ಧೂರಿ ಆರಂಭ ಸಿಕ್ಕಿದೆ.

ಡೊಮಿನಿಕಾದಲ್ಲಿ ವೆಸ್ಟ್​ ಇಂಡೀಸ್ ವಿರುದ್ಧ ನಡೆದ ಮೊದಲ ಟೆಸ್ಟ್​​ನಲ್ಲಿ ಟೀಂ ಇಂಡಿಯಾ ಇನ್ನೂ ಎರಡು ದಿನಗಳ ಆಟ ಬಾಕಿ ಇರುವಂತೆಯೆ ವಿಜಯದ ನಗಾರಿ ಬಾರಿಸಿದೆ.

312/2 ಓವರ್​ ನೈಟ್​ ಸ್ಕೋರ್​ನೊಂದಿಗೆ ಮೂರನೇ ದಿನದ ಆಟ ಆರಂಭಿಸಿದ ಭಾರತ. 421/5ಕ್ಕೆ ಇನ್ನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡಿತು. ಈ ಮೂಲಕ ಮೊದಲ ಇನ್ನಿಂಗ್ಸ್​ನಲ್ಲಿ 271ರನ್​ಗಳ ಮುನ್ನಡೆ ಸಂಪಾದಿಸಿತು.

ನಂತರ ಎರಡನೇ ಇನ್ನಿಂಗ್ಸ್ ಆರಂಭಿಸಿದ ವೆಸ್ಟ್ ಇಂಡೀಸ್​ ಅಶ್ವಿನ್ ಎಂಬ ಸ್ಪಿನ್ ಮಾಂತ್ರಿಕ (7/71)ನ ಜಾಲದಲ್ಲಿ ಸಿಲುಕಿ ಕೇವಲ 130 ರನ್​ಗಳಿಗೆ ಸರ್ವಪತನ ಕಂಡಿತು.

ಇದರೊಂದಿಗೆ ಭಾರತ ಇನ್ನಿಂಗ್ಸ್ ಮತ್ತು 141 ರನ್​ಗಳ ಅಂತರದಿಂದ ಭಾರೀ ಗೆಲುವು ಸಾಧಿಸಿತು.

ಮೊದಲ ಇನ್ನಿಂಗ್ಸ್​ನಲ್ಲಿ ವಿಂಡೀಸ್ 141 ರನ್​ಗಳಿಗೆ ಆಲೌಟ್​ ಆಗಿತ್ತು.

ಮೊದಲ ಪಂದ್ಯದಲ್ಲೇ ಭರ್ಜರಿ ಶತಕ ಸಿಡಿಸಿದ ಯಶಸ್ವಿ ಜೈಸ್ವಾಲ್ ನಿರೀಕ್ಷೆಯಂತೆಯೇ ಪ್ಲೇಯರ್ ಆಫ್​ ದಿ ಮ್ಯಾಚ್ ಆದರು.

ಎರಡನೇ ಟೆಸ್ಟ್ ಜುಲೈ 20ರಿಂದ ಆರಂಭವಾಗಲಿದೆ.

ವಿಂಡೀಸ್ ಪತನ ಹೀಗಾಯ್ತು..

ಮೊದಲ ಇನ್ನಿಂಗ್ಸ್​ನಲ್ಲಿ ಐದು ವಿಕೆಟ್ ಪಡೆದಿದ್ದ ಅಶ್ವಿನ್ ಎರಡನೇ ಇನ್ನಿಂಗ್ಸ್​ನಲ್ಲಿಯೂ ತಮ್ಮ ಸ್ಪಿನ್ ಮಾಯಾಜಾಲ ಪ್ರದರ್ಶಿಸಿದರು. ಇದರೊಂದಿಗೆ ಕೆರಿಬಿಯನ್ ಬ್ಯಾಟರ್​ಗಳು ಪವಿಲಿಯನ್ ಪರೇಡ್ ನಡೆಸಿದರು.

ತ್ಯಾಗ್​ನಾರಾಯಣ್ ಚಂದ್ರಪಾಲ್​(7)ರನ್ನು ಜಡೇಜಾ ಎಲ್​ಬಿ ಮಾಡುವುದರೊಂದಿಗೆ  ವಿಂಡೀಸ್ ಪತನ ಶುರುವಾಯಿತು.. ಕೆಲ ಹೊತ್ತಿಗೆಲ್ಲಾ ಕ್ರೆಗ್ ಬ್ರಾತ್​ವೈಟ್​(7) ಅಶ್ವಿನ್ ಬೌಲಿಂಗ್​ನಲ್ಲಿ ಸ್ಲಿಪ್​ನಲ್ಲಿದ್ದ ರಹಾನೆ ಕೈಗೆ ಕೈಗೆ ಕ್ಯಾಚಿತ್ತರು. ಟೀ ವಿರಾಮದ ಹೊತ್ತಿಗೆ ವಿಂಡೀಸ್ ಪರಿಸ್ಥಿತಿ 27/2 .

ಕೊನೆಯ ಸೆಷನ್​ನಲ್ಲಿ 8 ವಿಕೆಟ್​ ಕಳೆದುಕೊಂಡಿತು. ಕೊನೆಯ ಸೆಷನ್ ಆರಂಭ ಆಗುತ್ತಲೇ ಬ್ಲಾಕ್​ವುಡ್​(5)ರನ್ನು ಅಶ್ವಿನ್​ ಪೆವಿಲಿಯನ್​ಗೆ ಕಳಿಸಿದರು. ನಂತರ ರಿಫರ್​(11) ವಿಕೆಟ್ ಅನ್ನು ಜಡೇಜಾ ಪಡೆದರು. ಸಿರಾಜ್ ಬೌಲಿಂಗ್​ನಲ್ಲಿ ದ ಸಿಲ್ವಾ(13) ಎಲ್​ಬಿ ಆದರು.

ಕೊನೆಯ ಐದು ವಿಕೆಟ್​ಗಳು ಅಶ್ವಿನ್ ಪಾಲಾದವು. ಅಥನೇಜ್​(28),ಅಲ್ಜಾರಿ ಜೋಸೆಫ್​(13), ರಖೀಮ್ ಕಾರ್ನಿವಾಲ್​​(4), ಕಿಮರ್ ರೋಚ್​(0), ವಾರಿಕನ್​(18) ವಿಕೆಟ್​ಗಳನ್ನು ಅಶ್ವಿನ್​ ಕೊಳ್ಳೆಹೊಡಡೆದರು.

ಯಶಸ್ಸಿನ ಜೈತ್ರಯಾತ್ರೆ ಶುರು ಮಾಡಿದ ಜೈಸ್ವಾಲ್

ಮೊದಲ ಇನ್ನಿಂಗ್ಸ್​ನಲ್ಲಿ ಟೀಂ ಇಂಡಿಯಾ ಯುವ ಬ್ಯಾಟರ್ ಯಶಸ್ವಿ ಜೈಸ್ವಾಲ್ ಪದಾರ್ಪಣೆ ಪಂದ್ಯದಲ್ಲಿಯೇ ಶತಕ ಬಾರಿಸಿದರು.

387 ಎಸೆತಗಳಲ್ಲಿ 14 ಫೋರ್​, 1 ಸಿಕ್ಸ್ ಸಹಿತ 171 ರನ್​ ಗಳಿಸಿ ಮಿಂಚಿದರು. ಇನ್ನು ಎಂಟು ರನ್ ಗಳಿಸಿದ್ದರೆ ಶಿಖರ್ ಧವನ್ ದಾಖಲೆ ಮೀರಿ ನಯಾ ರೆಕಾರ್ಡ್​​ಗೆ ಜೈಸ್ವಾಲ್​ ಪಾತ್ರರಾಗುತ್ತಿದ್ದರು.

ಕ್ಯಾಪ್ಟನ್ ರೋಹಿತ್ ಶರ್ಮಾ 103ರನ್, ವಿರಾಟ್ ಕೊಹ್ಲಿ 76ರನ್​, ಜಡೇಜಾ ಔಟಾಗದೇ 37 ರನ್​ ಗಳಿಸಿ ಮಿಂಚಿದರು.

ವಿಂಡೀಸ್ ಬೌಲರ್​ಗಳ ಪೈಕಿ ಕಿಮರ್ ರೋಚ್​, ಅಲ್ಜಾರಿ ಜೋಸೆಫ್​, ರಖೀಮ್ ಕಾರ್ನಿವಾಲ್​, ವಾರಿಕನ್, ಅಥನೇಜ್ ತಲಾ ಒಂದು ವಿಕೆಟ್ ಪಡೆದರು