ಗುಜರಾತ್​ ಮೂಲದ ಸಂಸ್ಥೆ ಮೂಲಕ KMF ಹುದ್ದೆಗಳಿಗೆ ಪರೀಕ್ಷೆ – 487 ಹುದ್ದೆಗಳ ನೇಮಕಾತಿಗೆ ಹೈಕೋರ್ಟ್​ ತಡೆಯಾಜ್ಞೆ

ಗುಜರಾತ್​ ಮೂಲದ ಸಂಸ್ಥೆಯ ಮೂಲಕ ಕರ್ನಾಟಕ ಹಾಲು ಒಕ್ಕೂಟ ಕೆಎಂಎಫ್​ಗೆ ನಡೆಸಲಾಗಿದ್ದ 487 ಹುದ್ದೆಗಳ ನೇಮಕಾತಿ ಪ್ರತಿಕ್ರಿಯೆಗೆ ಕರ್ನಾಟಕ ಹೈಕೋರ್ಟ್ ತಡೆಯಾಜ್ಞೆ ವಿಧಿಸಿ ಮಧ್ಯಂತರ ಆದೇಶ ನೀಡಿದೆ.

ಕಳೆದ ವರ್ಷದ ಅಕ್ಟೋಬರ್​ 20ರಂದು ಕೆಎಂಎಫ್​ನಲ್ಲಿ 487 ಹುದ್ದೆಗಳ ಭರ್ತಿಗೆ ಅಧಿಸೂಚನೆ ಹೊರಡಿಸಲಾಗಿತ್ತು.

ಆದರೆ ಪರೀಕ್ಷಾ ಪ್ರಕ್ರಿಯೆನ್ನು ನಡೆಸುವ ಗುತ್ತಿಗೆಯನ್ನು ಗುಜರಾತ್​ ಮೂಲದ ಸಂಸ್ಥೆ ಗ್ರಾಮೀಣ ನಿರ್ವಹಣಾ ಸಂಸ್ಥೆ, ಆನಂದ್​ (IRMA)ಗೆ ಕೆಎಂಎಫ್​ ನೀಡಿತ್ತು.

ಡಿಸೆಂಬರ್​ 18ರಂದು ಪರೀಕ್ಷೆ ನಡೆಸಿ ಜನವರಿ 23ರಂದು ಫಲಿತಾಂಶ ಪ್ರಕಟಿಸಲಾಗಿತ್ತು.

ಆದರೆ ನೇಮಕಾತಿ ಪ್ರಕ್ರಿಯೆಯನ್ನು ಪ್ರಶ್ನಿಸಿ ಚಿಕ್ಕಬಳ್ಳಾಪುರ ಮೂಲದ ಇಟಾಪನಹಳ್ಳಿ ಹಾಲು ಉತ್ಪಾದಕರ ಸಂಘ ಹೈಕೋರ್ಟ್​ನಲ್ಲಿ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸಲ್ಲಿಸಿತ್ತು.

ಕೆಎಂಎಫ್​ ನಿಯಮಗಳ ಪ್ರಕಾರ ನೇಮಕಾತಿ ವೇಳೆ 200 ಅಂಕಗಳ ಕನ್ನಡ ಭಾಷೆ ಪರೀಕ್ಷೆ ಕಡ್ಡಾಯವಾಗಿದೆ ಮತ್ತು ಕನ್ನಡ ಭಾಷೆಯನ್ನು ತಿಳಿದಿರುವ ರಾಜ್ಯದೊಳಗಿನ ಪರೀಕ್ಷಾ ಪ್ರಾಧಿಕಾರದ ಮೂಲಕವೇ ನಡೆಸಬೇಕು. ಆದರೆ ಐಆರ್​ಎಂಎಗೆ ಕನ್ನಡ ಭಾಷಾ ಜ್ಞಾನವಿಲ್ಲದೇ ಇದ್ದರೂ ಪರೀಕ್ಷಾ ಪ್ರಕ್ರಿಯೆ ನಡೆಸಲು ಗುತ್ತಿಗೆ ನೀಡಲಾಗಿದೆ.

ಅಲ್ಲದೇ ಪರೀಕ್ಷಾ ಪ್ರಕ್ರಿಯೆ ನಡೆಸಲು ಗುಜರಾತ್​ನ ಈ ಸಂಸ್ಥೆಗೆ 2.5 ಕೋಟಿ ರೂಪಾಯಿ ನೀಡಲಾಗಿದೆ.

ಸುಪ್ರೀಂಕೋರ್ಟ್​ ನಿಯಮಗಳ ಪ್ರಕಾರ ಸಂದರ್ಶನಕ್ಕೂ ಮೊದಲು ಪರೀಕ್ಷಾಅಂಕಗಳನ್ನು ಪ್ರಕಟಿಸುವಂತಿಲ್ಲ ಎಂದು ಸುಪ್ರೀಂಕೋರ್ಟ್​ ಈ ಹಿಂದೆ ನೀಡಿದ್ದ ತೀರ್ಪನ್ನೂ ಉಲ್ಲಂಘಿಸಲಾಗಿದೆ ಎಂದು ಅರ್ಜಿದಾರರು ವಾದಿಸಿದ್ದರು.