ಇಸ್ರೇಲ್ ಮತ್ತು ಹಮಾಸ್ ನಡುವಿನ ಯುದ್ಧ ಸಂಘರ್ಷಕ್ಕೆ ಇವತ್ತಿಗೆ 26ನೇ ದಿನ. ಮಧ್ಯಪ್ರಾಚ್ಯದಲ್ಲಿ ಈ ಸಂಘರ್ಷದ ಕಾರಣದಿಂದಾಗಿ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾತೈಲ ಇನ್ನಷ್ಟು ದುಬಾರಿ ಆಗುತ್ತಾ..?
ಕಚ್ಚಾತೈಲ ದುಬಾರಿಯಾದರೆ ಭಾರತದಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಮತ್ತು ಅಡುಗೆ ಅನಿಲದ ದರ ಇನ್ನಷ್ಟು ಏರಿಕೆ ಅಗುತ್ತಾ..?
50 ವರ್ಷಗಳ ಹಿಂದೆ ಮಧ್ಯಪ್ರಾಚ್ಯದಲ್ಲಾದ ಬಿಕ್ಕಟ್ಟಿನ ಕಾರಣದಿಂದ ಸೃಷ್ಟಿಯಾದ ತೈಲ ಬಿಕ್ಕಟ್ಟಿನ ಪರಿಸ್ಥಿತಿಯೇ ಮತ್ತೆ ಪುನರಾವರ್ತನೆ ಆಗುತ್ತಾ..?
ಇಸ್ರೇಲ್ ಮತ್ತು ಹಮಾಸ್ ಸಂಘರ್ಷದ ಕಾರಣದಿಂದ ಸೃಷ್ಟಿಯಾಗಬಹುದಾದ ಕಚ್ಚಾತೈಲ ಆತಂಕದ ಬಗ್ಗೆ ವಿಶ್ವಬ್ಯಾಂಕ್ ಮೂರು ಪ್ರಮುಖ ಲೆಕ್ಕಾಚಾರವನ್ನು ಮುಂದಿಟ್ಟಿದೆ. ಈಗ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾತೈಲದ ಬೆಲೆ ಬ್ಯಾರೆಲ್ಗೆ 87 ಡಾಲರ್.
1. ಒಂದು ವೇಳೆ ಸಂಘರ್ಷ ತೀವ್ರಗೊಂಡರೆ ಆ ಕಾರಣದಿಂದ ಕಚ್ಚಾತೈಲ ಉತ್ಪಾದನೆಯಲ್ಲಿ ಅಲ್ಪ ಪ್ರಮಾಣದ ಏರಿಳಿತವಾದರೆ ಅಂದರೆ ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಪ್ರತಿ ದಿನ ಕಚ್ಚಾತೈಲದ ಪೂರೈಕೆ 5 ಲಕ್ಷದ ಬ್ಯಾರೆಲ್ನಿಂದ 20 ಲಕ್ಷ ಬ್ಯಾರೆಲ್ನ್ನಷ್ಟು ಇಳಿಕೆಯಾದರೆ ಆಗ ಕಚ್ಚಾತೈಲದ ಬೆಲೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಶೇಕಡಾ 3ರಿಂದ 13ರಷ್ಟು ಅಂದರೆ 93 ಡಾಲರ್ನಿಂದ 102 ಡಾಲರ್ನವರೆಗೆ ಏರಿಕೆ ಆಗಬಹುದು. 2011ರಲ್ಲಿ ಲಿಬಿಯಾದಲ್ಲಾದ ನಾಗರಿಕ ಸಂಘರ್ಷದ ಕಾರಣದಿಂದ ಇಂಥದ್ದೇ ಸನ್ನಿವೇಶ ಸೃಷ್ಟಿಯಾಗಿತ್ತು.
2. ಮಧ್ಯಮ ಸ್ವರೂಪದ ಏರಿಳಿತ ಅಂದರೆ ಒಂದು ವೇಳೆ ಕಚ್ಚಾತೈಲ ಉಗ ತ್ಪಾದನೆ ಪ್ರತಿ ದಿನಕ್ಕೆ 30 ಲಕ್ಷ ಬ್ಯಾರೆಲ್ನಿಂದ 50 ಲಕ್ಷ ಬ್ಯಾರೆಲ್ನ್ನಷ್ಟು ಕಡಿತವಾದರೆ ಆಗ ಕಚ್ಚಾತೈಲದ ಬೆಲೆ ಬ್ಯಾರೆಲ್ಗೆ ಶೇಕಡಾ 21ರಿಂದ 35ರಷ್ಟು ಹೆಚ್ಚಳ ಆಗಲಿದೆ. ಆಗ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಬರೋಬ್ಬರೀ 109ರಿಂದ 121 ಡಾಲರ್ಗೆ ಏರಿಕೆ ಆಗಲಿದೆ. 2003ರಲ್ಲಿ ಇರಾಕ್ ಯುದ್ಧದ ವೇಳೆ ಕಚ್ಚಾತೈಲದ ಬೆಲೆ ಈ ಪ್ರಮಾಣದ ಏರಿಕೆಯನ್ನು ಕಂಡಿತ್ತು.
3. ಒಂದು ವೇಳೆ ಇಸ್ರೇಲ್ ಮತ್ತು ಹಮಾಸ್ ಸಂಘರ್ಷ ಇನ್ನಷ್ಟು ತೀವ್ರಗೊಂಡು ತೀವ್ರ ಗಂಭೀರ ಪರಿಣಾಮಗಳಾದರೆ ಆಗ ಕಚ್ಚಾ ತೈಲ ಉತ್ಪಾದನೆ ಪ್ರತಿ ದಿನ 60 ಲಕ್ಷದಿಂದ 80 ಲಕ್ಷ ಬ್ಯಾರೆಲ್ನ್ನಷ್ಟು ಕಡಿತವಾದರೆ ಕಚ್ಚಾತೈಲ ದರ ಶೇಕಡಾ 56ರಿಂದ 75ರಷ್ಟು ಹೆಚ್ಚಳ ಕಂಡು ಬ್ಯಾರೆಲ್ ದರ 140 ಡಾಲರ್ರಿಂದ 157 ಡಾಲರ್ವರೆಗೂ ಏರಿಕೆ ಆಗಬಹುದು. 1973ರಲ್ಲಾದ ಮಧ್ಯಪ್ರಾಚ್ಯ ಯುದ್ಧದ ಕಾರಣದಿಂದ ಬ್ಯಾರೆಲ್ ದರ ಈ ಪ್ರಮಾಣದಲ್ಲಿ ಏರಿಕೆ ಕಂಡಿತ್ತು.
ಕಚ್ಚಾತೈಲದಲ್ಲಾಗುವ ಏರಿಳಿತ ಇತರೆ ಉತ್ಪನ್ನಗಳ ಬೆಲೆಯ ಮೇಲೂ ನೇರ ಪರಿಣಾಮ ಬೀರಲಿದೆ. ಇತರೆ ಉತ್ಪನ್ನಗಳ ಬೆಲೆ ಏರಿಕೆ ಸಹಜವಾಗಿಯೇ ಜನಜೀವನದ ದಿನನಿತ್ಯದ ವೆಚ್ಚವನ್ನು ದುಬಾರಿ ಮಾಡಲಿದೆ.
ಮಾಹಿತಿ: 1 ಬ್ಯಾರೆಲ್ ಎಂದರೆ 159 ಲೀಟರ್. ಬ್ಯಾರೆಲ್ನಲ್ಲಾಗುವ ದರ ಬದಲಾವಣೆಯನ್ನು ತೈಲ ಕಂಪನಿಗಳು ನೇರವಾಗಿ ತಮ್ಮ ಗ್ರಾಹಕರಿಗೆ ವರ್ಗಾಯಿಸುತ್ತವೆ.
ಮಾಹಿತಿ 2: ಭಾರತದಲ್ಲಿ ದಿನ ತೈಲ ಬಳಕೆ ಪ್ರಮಾಣ 44 ಲಕ್ಷದ 43 ಸಾವಿರ ಬ್ಯಾರೆಲ್. ಭಾರತ ಪ್ರತಿ ದಿನ ಆಮದು ಮಾಡಿಕೊಳ್ಳುತ್ತಿರುವ ಕಚ್ಚಾತೈಲದ ಪ್ರಮಾಣ 42 ಲಕ್ಷದ 55 ಸಾವಿರ ಬ್ಯಾರೆಲ್.
