Section 66A: ಇದು ನಾವು, ನೀವು ತಿಳಿದುಕೊಳ್ಳಲೇಬೇಕಾಗಿರುವ Section

ಮಾಹಿತಿ ತಂತ್ರಜ್ಞಾನ ಕಾಯ್ದೆಯ (IT ACT) ಸೆಕ್ಷನ್​​ 66ಎ (Section 66A) ಅಡಿ ಪ್ರಕರಣ ದಾಖಲಿಸುವಂತಿಲ್ಲ, ವಿಚಾರಣೆ ನಡೆಸುವಂತಿಲ್ಲ ಎಂದು ಸುಪ್ರೀಂಕೋರ್ಟ್ (Supreme Court)​ ತ್ರಿಸದಸ್ಯ ಪೀಠ ಸ್ಪಷ್ಟಪಡಿಸಿದೆ.

ಸುಪ್ರೀಂಕೋರ್ಟ್​​ ಮುಖ್ಯ ನ್ಯಾಯಮೂರ್ತಿ ಯು ಯು ಲಲಿತ್​, ನ್ಯಾಯಮೂರ್ತಿ ರವೀಂದ್ರ ಭಟ್​ ಮತ್ತು ನ್ಯಾಯಮೂರ್ತಿ ಅಜಯ್​ ರಸ್ತೋಗಿ ಅವರ ಪೀಠ ಈ ಬಗ್ಗೆ ಇವತ್ತು ಸ್ಪಷ್ಟಪಡಿಸಿದೆ.

2015ರಲ್ಲಿ ಶ್ರೇಯಾ ಸಿಂಘಾಲ್​ ಮತ್ತು ಭಾರತ ಸರ್ಕಾರದ ನಡುವಿನ ಪ್ರಕರಣದಲ್ಲಿ IT ಕಾಯ್ದೆಯ 66ಎ ಸೆಕ್ಷನ್​ನ್ನು ಸುಪ್ರೀಂಕೋರ್ಟ್​ ವಜಾಗೊಳಿಸಿತ್ತು.

ಆದರೆ 2015ರ ತೀರ್ಪಿನಲ್ಲಿ ಸೆಕ್ಷನ್​ 66ಎ ರದ್ದಾಗಿದ್ದರೂ ಪ್ರಕರಣಗಳನ್ನು ದಾಖಲಿಸಿಕೊಳ್ಳಲಾಗುತ್ತಿದೆ ಎಂದು ಅರ್ಜಿದಾರರು ಸರ್ವೋಚ್ಛ ನ್ಯಾಯಾಲಯದ ಗಮನಕ್ಕೆ ತಂದರು.

ಆ ತೀರ್ಪಿನ ಅನುಷ್ಠಾನಗೊಳಿಸುವಂತೆ ಕೋರಿ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ನಡೆಸಿದ ಸುಪ್ರೀಂಕೋರ್ಟ್​ ಈ ಆದೇಶ ನೀಡಿದೆ.

1. ಸೆಕ್ಷನ್​ 66ಎ ಉಲ್ಲಂಘನೆ ಆರೋಪದಡಿ ಪ್ರಕರಣ ದಾಖಲಿಸಿಕೊಳ್ಳುವಂತಿಲ್ಲ ಮತ್ತು ವಿಚಾರಣೆ ನಡೆಸುವಂತಿಲ್ಲ.

2. ಒಂದು ವೇಳೆ ಸೆಕ್ಷನ್​ 66ಎ ಅಡಿ ನಾಗರಿಕರು ವಿಚಾರಣೆ ಎದುರಿಸುತ್ತಿದ್ದರೆ ಆ ಸೆಕ್ಷನ್​ನಡಿ ಮಾಡಲಾದ ಆರೋಪ ಮತ್ತು ಆ ಭಾಗಗಳು ವಜಾಗೊಳ್ಳಲಿವೆ.

3. ಗೃಹ ಇಲಾಖೆ ಕಾರ್ಯದರ್ಶಿ, ರಾಜ್ಯಗಳ ಪೊಲೀಸ್​ ಮಹಾನಿರ್ದೇಶಕರು ಮತ್ತು ಸಂಬಂಧಪಟ್ಟ ಪ್ರಾಧಿಕಾರಗಳು ಸೆಕ್ಷನ್​ 66ಎ ಅಡಿ ಪ್ರಕರಣ ದಾಖಲಾಗದಂತೆ ನೋಡಿಕೊಳ್ಳಬೇಕು.

ಏನಿದು ಸೆಕ್ಷನ್​ 66ಎ..?

2008ರಲ್ಲಿ ಆಗಿನ ಯುಪಿಎ ಸರ್ಕಾರ ಮಾಹಿತಿ ತಂತ್ರಜ್ಞಾನ ಕಾಯ್ದೆಗೆ ತಿದ್ದುಪಡಿ ತರುವ ಮೂಲಕ ಸೆಕ್ಷನ್​ 66ಎಯನ್ನು ಕಾಯ್ದೆಯೊಳಗೆ ಪರಿಚಯಿಸಿತು.

ಈ ಸೆಕ್ಷನ್​ನಡಿ ಒಂದು ವೇಳೆ ಆನ್​ಲೈನ್​ ಪೋಸ್ಟ್​​ಗಳು (Online Posts – Facebook, Twitter, Whats app, Instagram ಮುಂತಾದ ಸಾಮಾಜಿಕ ಜಾಲತಾಣಗಳು ಸೇರಿದಂತೆ) ಅನುಚಿತ ಮತ್ತು ಮಾನಹಾನಿಕರ, ಸುಳ್ಳು ಎಂದು ಭಾವಿಸಿದ್ದಲ್ಲಿ ಆ ಸರ್ಕಾರಕ್ಕೆ ಅಂತಹ ಪೋಸ್ಟ್​ನ್ನು ಹಾಕಿದ ವ್ಯಕ್ತಿಯನ್ನು ಬಂಧಿಸುವ ಅಧಿಕಾರವನ್ನು ನೀಡಿತ್ತು. ಈ ಪ್ರಕರಣದಲ್ಲಿ ಮೂರು ವರ್ಷಗಳವರೆಗೆ ಶಿಕ್ಷೆ ನೀಡುವ ಅಂಶವನ್ನೂ ಸೇರಿಸಲಾಗಿತ್ತು.