Darshan: ನಟ ದರ್ಶನ್​ ಪಾರ್ಟಿ ನೋಟಿಸ್​..! – ವಿಚಾರಣೆಗೆ ದರ್ಶನ್​ ಗೈರು

ನಿಯಮ ಉಲ್ಲಂಘಿಸಿ ನಸುಕಿನ ಜಾವದವರೆಗೂ ಪಾರ್ಟಿ ಮಾಡಿದ್ದರ ಸಂಬಂಧ ನಟ, ಚಾಲೆಂಜಿಂಗ್​ ಸ್ಟಾರ್​ ದರ್ಶನ್​ ಸೇರಿದಂತೆ 8 ಮಂದಿಗೆ ಬೆಂಗಳೂರು ಪೊಲೀಸರು ನೋಟಿಸ್​ ಜಾರಿ ಮಾಡಿದ್ದಾರೆ.

ನಟ ದರ್ಶನ್​, ಕಾಟೇರಾ ಸಿನಿಮಾ ನಿರ್ಮಾಪಕ ರಾಕ್​ಲೈನ್​ ವೆಂಕಟೇಶ್​, ಅಭಿಷೇಕ್​ ಅಂಬರೀಶ್​, ಡಾಲಿ ಧನಂಜಯ್​, ಕಾಟೇರಾ ನಿರ್ದೇಶಕ ತರುಣ್​ ಸುಧೀರ್​, ಚಿಕ್ಕಣ್ಣ, ಸಂಗೀತ ನಿರ್ದೇಶಕ ವಿ ಹರಿಕೃಷ್ಣ, ನೀನಾಸಂ ಸತೀಶ್​​ಗೆ ನೋಟಿಸ್​ ನೀಡಲಾಗಿದೆ.

ವಿಚಾರಣೆಗೆ ಹಾಜರಾಗದ ನಟ ದರ್ಶನ್​:

ಜನವರಿ 8ರಂದು ಬೆಳಗ್ಗೆ 11 ಗಂಟೆಗೆ ವಿಚಾರಣೆಗೆ ಹಾಜರಾಗುವಂತೆ ನಟ ದರ್ಶನ್ ಮತ್ತು ನಿರ್ದೇಶಕ ತರುಣ್​ ಸುಧೀರ್​ಗೆ ಸುಬ್ರಹ್ಮಣ್ಯ ನಗರ ಪೊಲೀಸರು ನೋಟಿಸ್​ ನೀಡಿದ್ದರು. ಆದರೆ ಕಾಟೇರಾ ಸಿನಿಮಾದ ಪ್ರಚಾರಕ್ಕಾಗಿ ಇಬ್ಬರೂ ಜನವರಿ 4ರಂದೇ ದುಬೈಗೆ ಪ್ರಯಾಣಿಸಿದ್ದರು. ಈ ಹಿನ್ನೆಲೆಯಲ್ಲಿ ಇಬ್ಬರೂ ವಿಚಾರಣೆಗೆ ಹಾಜರಾಗಿಲ್ಲ.

ಸಂಭ್ರಮದಲ್ಲಿ ನಿಯಮ ಉಲ್ಲಂಘನೆ:

ಜನವರಿ 3ರಂದು ಬೆಂಗಳೂರಿನ ರಾಜಾಜಿನಗರದಲ್ಲಿರುವ ಓರಾಯನ್​ ಮಾಲ್​ನಲ್ಲಿ ಕಾಟೇರಾ ಸಿನಿಮಾದ ವಿಶೇಷ ಪ್ರದರ್ಶನ ಆಯೋಜಿಸಲಾಗಿತ್ತು. ಆ ಬಳಿಕ ಓರಾಯನ್​ ಮಾಲ್​ ಎದುರಿರುವ ನಿರ್ಮಾಪಕ ಸೌಂದರ್ಯ ಜಗದೀಶ್​​ ಪತ್ನಿ ಶಶಿರೇಖಾ ಜಗದೀಶ್​ ಮಾಲೀಕತ್ವದ ಜೆಟ್​ಲ್ಯಾಗ್​ ಪಬ್​ನಲ್ಲಿ ಜನವರಿ 4ರ ನಸುಕಿನ ಜಾವ 3.30ರವರೆಗೂ ಪಾರ್ಟಿ ಮಾಡಿದ್ದರು. ರಾತ್ರಿ 1 ಗಂಟೆಯವರೆಗೆ ಮಾತ್ರ ಪಾರ್ಟಿಗೆ ಅನುಮತಿ ಇತ್ತು.