ವಡನ್​ಬೈಲ್​ ಪದ್ಮಾವತಿ ಬಸದಿ ಗುರುಗಳಾದ ವೀರರಾಜ್​ ಜೈನ್​ ಅಪಘಾತ – ಸ್ಥಿತಿ ಗಂಭೀರ

ಶಿವಮೊಗ್ಗ ಜಿಲ್ಲೆಯ ವಡನ್​ಬೈಲ್​ ಪದ್ಮಾವತಿ ಬಸದಿ ಗುರುಗಳಾದ ಧರ್ಮದರ್ಶಿ ಹೆಚ್​ ಕೆ ವೀರರಾಜ್​ ಜೈನ್​ ಅವರು ಅಪಘಾತದಲ್ಲಿ ಗಂಭೀರವಾಗಿ ಗಾಯಗೊಂಡಿದ್ದಾರೆ. ಅವರ ಸಹೋದರ ಮೃತಪಟ್ಟಿದ್ದಾರೆ.

ಶಿವಮೊಗ್ಗ ಜಿಲ್ಲೆಯ ಜೋಗ ಮತ್ತು ಕಾರ್ಗಲ್​ ನಡುವೆ ವಾಯುವ್ಯ ಕರ್ನಾಟಕ ಸಾರಿಗೆ ಬಸ್​ ಮತ್ತು ಗುರುಗಳು ಪ್ರಯಾಣಿಸುತ್ತಿದ್ದ ಒಮಿನಿ ನಡುವೆ ಮುಖಾಮುಖಿ ಡಿಕ್ಕಿ ಸಂಭವಿಸಿದೆ.

ಅಪಘಾತದಲ್ಲಿ ಗುರುಗಳಾದ ವೀರರಾಜ್​ ಜೈನ್​ ಅವರಿಗೆ ಗಂಭೀರ ಪೆಟ್ಟುಬಿದ್ದಿದೆ. ಇವರಿಗೆ 75 ವರ್ಷ ವಯಸ್ಸು. ಇವರ ತಲೆಗೆ ಗಂಭೀರ ಪೆಟ್ಟು ಬಿದ್ದಿರುವ ಕಾರಣ ಹೆಚ್ಚಿನ ಚಿಕಿತ್ಸೆಗಾಗಿ ಮಣಿಪಾಲಕ್ಕೆ ಕರೆದುಕೊಂಡು ಹೋಗಲಾಗುತ್ತಿದೆ ಎಂಬ ಮಾಹಿತಿ ಸಿಕ್ಕಿದೆ.

ಶಿಮಮೊಗ್ಗ ಜಿಲ್ಲೆಯ ಜೋಗಫಾಲ್ಸ್​ನಿಂದ 8 ಕಿಲೋ ಮೀಟರ್​ ದೂರದಲ್ಲಿರುವ ಶಕ್ತಿ ದೇವತೆ ವಡನ್​ಬೈಲ್​ ಪದ್ಮಾವತಿ ಬಸದಿ ಅಪಾರ ಸಂಖ್ಯೆಯಲ್ಲಿ ಭಕ್ತಾದಿಗಳು ಬರುತ್ತಾರೆ.

ಹಾವಿನ ಹುತ್ತದಿಂದ ಒಳಗೊಂಡಿರುವ ಬಸದಿ ಇಲ್ಲಿಯ ವಿಶೇಷ. ವಡನ್​ಬೈಲ್​ ಪದ್ಮಾವತಿಗೆ ಬಳೆ ಹರಕೆ ಕೊಡುವುದು ಪ್ರಮುಖ ವಿಶೇಷ. ಹೀಗಾಗಿ ಈ ದೇವಿಯನ್ನು ಬಳೆ ಪದ್ಮಾವತಿ ಎಂದೂ ಭಕ್ತರು ಪೂಜಿಸುತ್ತಾರೆ.

ಆರಂಭದಲ್ಲಿ ನಾಸ್ತಿಕರಾಗಿದ್ದ ವೀರರಾಜ್​ ಜೈನ್​ ಅವರು 1965ರಲ್ಲಿ ಪದ್ಮಾವತಿ ದೇವಿಯ ಕಾರ್ಣಿಕಕ್ಕೆ ಶರಣಾಗಿ ತಮ್ಮ ವೃತ್ತಿಗೆ ರಾಜೀನಾಮೆ ಕೊಟ್ಟು ದೇವಿಯ ಸೇವೆಯಲ್ಲೇ ತೊಡಗಿಸಿಕೊಂಡಿದ್ದರು.

ದೇವಸ್ಥಾನದಲ್ಲಿ ಸದ್ಯಕ್ಕೆ ಹೊಸ ನಿರ್ಮಾಣ ಕಾರ್ಯಗಳೂ ನಡೆಯುತ್ತಿವೆ.