ಬಿಜೆಪಿ ಸರ್ಕಾರದಲ್ಲಿ ಸ್ಯಾಂಕಿ ಹೋರಾಟಗಾರರ ಮೇಲೆ ದಾಖಲಿಸಿದ್ದ ಪ್ರಕರಣ ರದ್ದುಗೊಳಿಸಿದ ಪೊಲೀಸರು

ಬಸವರಾಜ ಬೊಮ್ಮಾಯಿ ನೇತೃತ್ವದ ಬಿಜೆಪಿ ಸರ್ಕಾರದ ಅವಧಿಯಲ್ಲಿ ಬೆಂಗಳೂರಲ್ಲಿ ಸ್ಯಾಂಕಿ ಕೆರೆ ರಕ್ಷಣೆ ಹೋರಾಟಗಾರರ ಮೇಲೆ ದಾಖಲಿಸಿದ್ದ ಪ್ರಕರಣವನ್ನು ಪೊಲೀಸರು ವಾಪಸ್​ ಪಡೆದಿದ್ದಾರೆ.

ಈ ಬಗ್ಗೆ ಹಲಸೂರು ಗೇಟ್​ ಠಾಣೆ ಪೊಲೀಸರು ಮೇ 30ರಂದು ಅಂದರೆ ಇವತ್ತು ಬೆಂಗಳೂರಿನ ಕೋರ್ಟ್​ಗೆ ಬಿ ರಿಪೋರ್ಟ್​ ಸಲ್ಲಿಸಿದ್ದಾರೆ ಎಂದು News Minute ವರದಿ ಮಾಡಿದೆ.

ಮೇ 29ರಂದು ಅಂದರೆ ನಿನ್ನೆ ಸೋಮವಾರ ಕರ್ನಾಟಕ ಹೈಕೋರ್ಟ್​ ಪೊಲೀಸರ ತನಿಖೆಗೆ ತಡೆಯಾಜ್ಞೆ ನೀಡಿತ್ತು.

ಫೆಬ್ರವರಿ 19ರಂದು ಮಲ್ಲೇಶ್ವರಂನಲ್ಲಿರುವ ಸ್ಯಾಂಕಿ ಕೆರೆ ಪ್ರದೇಶದಲ್ಲಿ ಮೇಲ್ಸೇತುವೆ ಕಾಮಗಾರಿ ಕೈಗೊಳ್ಳದಂತೆ ಮತ್ತು ರಸ್ತೆ ಅಗಲೀಕರಣ ಮಾಡದಂತೆ ಶಾಂತಿಯುತ ಪ್ರತಿಭಟನೆ ನಡೆದಿತ್ತು. 

ಬಿಜೆಪಿ ಶಾಸಕ, ಮಾಜಿ ಸಚಿವ ಡಾ ಸಿ ಎನ್​ ಅಶ್ವತ್ಥ್​ ನಾರಾಯಣ ಅವರ ಕ್ಷೇತ್ರದ ವ್ಯಾಪ್ತಿ ಸ್ಯಾಂಕಿ ಕೆರೆ ಬರುತ್ತದೆ.

ಶಾಂತಿಯುತ ಹೋರಾಟ ಕೈಗೊಂಡಿದ್ದ 8 ಮಂದಿ ನಾಗರಿಕರು ಮತ್ತು 70 ಮಂದಿ ಅಪರಿಚಿತರ ವಿರುದ್ಧ ಪೊಲೀಸರು ಐಪಿಸಿ ಕಲಂಗಳ 341, 141, 149, 283ರ ಅಡಿಯಲ್ಲಿ ಪ್ರಕರಣ ದಾಖಲಿಸಿದ್ದರು.

ಸ್ಯಾಂಕಿ ಕೆರೆ ರಕ್ಷಣೆ ಹೋರಾಟಗಾರ ಬೆಂಬಲಕ್ಕೆ ನಿಂತಿದ್ದ ಈಗ ಸಚಿವರಾಗಿರುವ ಪ್ರಿಯಾಂಕ್​ ಖರ್ಗೆ ಅವರು ಕಾಂಗ್ರೆಸ್​ ಸರ್ಕಾರ ಬಂದ ಬಳಿಕ ಪೊಲೀಸರ ವಿರುದ್ಧ ನಿರ್ದಾಕ್ಷಿಣ್ಯ ಕ್ರಮದ ಎಚ್ಚರಿಕೆ ನೀಡಿದ್ದರು.