ಮೋದಿ ಸರ್ಕಾರದಿಂದ ಸಹಾಯಧನ ಕಡಿತ – Ola ಎಲೆಕ್ಟ್ರಿಕ್​ ಸ್ಕೂಟರ್​ ದರ ಭಾರೀ ಹೆಚ್ಚಳ

ಕೇಂದ್ರ ಸರ್ಕಾರ ಸಹಾಯಧನ ಕಡಿತಗೊಳಿಸಿರುವ ಹಿನ್ನೆಲೆಯಲ್ಲಿ ಇವತ್ತಿನಿಂದ ಎಲೆಕ್ಟ್ರಿಕ್​ ಸ್ಕೂಟರ್​ಗಳ ಖರೀದಿ ದುಬಾರಿ ಆಗಲಿದೆ.

ಎಲೆಕ್ಟ್ರಿಕ್​ ಸ್ಕೂಟರ್​ ತಯಾರಿಕಾ ಕಂಪನಿ ಓಲಾ ತನ್ನ ಎಲೆಕ್ಟ್ರಿಕ್​ ಸ್ಕೂಟರ್​ಗಳ ಮೇಲಿನ ದರವನ್ನು ಹೆಚ್ಚಳ ಮಾಡಿದೆ.

ಓಲಾ ಎಸ್​1 ಮತ್ತು ಎಸ್​1 ಪ್ರೋ ಸ್ಕೂಟರ್​ಗಳ ಬೆಲೆ 15 ಸಾವಿರ ರೂಪಾಯಿ ಹೆಚ್ಚಳವಾಗಿದೆ.

ಎಸ್​1 ಬೆಲೆ 1,14,199 ರೂಪಾಯಿ ಇತ್ತು. ಈಗ ಇದರ ದರ 1,29,999 ರೂಪಾಯಿಗೆ ಹೆಚ್ಚಳವಾಗಿದೆ.

ಎಸ್​1ಪ್ರೋ ಇದರ ಬೆಲೆ 1,24,999 ರೂಪಾಯಿ ಇತ್ತು. ಈಗ ಇದರ ಬೆಲೆ 1,39,999 ರೂಪಾಯಿ ಆಗಿದೆ.

FAME ಸಹಾಯಧನ ಕಡಿತದ ಹೊಡೆತ:

FAME ಅಂದ್ರೆ ವೇಗದ ಅಳವಡಿಕೆ ಮತ್ತು ಎಲೆಕ್ಟ್ರಿಕ್​ ಉತ್ಪಾದನೆ (Faster Adoption and Manufacturing of Electric) ಸಹಾಯಧನ ಯೋಜನೆಯಡಿ ಕೇಂದ್ರ ಸರ್ಕಾರದ ನೀಡುತ್ತಿದ್ದ ಸಹಾಯಧನದ ಮಿತಿಯನ್ನು ಶೇಕಡಾ 40ರಿಂದ ಶೇಕಡಾ 15ಕ್ಕೆ ಕಡಿತಗೊಳಿಸಿದೆ. ಅಂದರೆ ಶೇಕಡಾ 25ರಷ್ಟು ಸಬ್ಸಿಡಿ ಕಡಿತಗೊಂಡಿದೆ. ಅಂದರೆ ಎಲೆಕ್ಟ್ರಿಕ್​ ಸ್ಕೂಟರ್​ಗಳ ಉತ್ಪಾದನಾ ವೆಚ್ಚದ ಭಾಗವಾಗಿ ಕಂಪನಿಗಳಿಗೆ ಸರ್ಕಾರ ನೀಡುತ್ತಿದ್ದ ಸಹಾಯಧನ.

2019ರಲ್ಲಿ ಜಾರಿಯಾದ ಈ ಯೋಜನೆಯಡಿಯಲ್ಲಿ ಓಲಾ ಎಸ್​1 ಪ್ರೋ ಉತ್ಪಾದನೆ ಮೇಲೆ 59,550 ರೂಪಾಯಿವರೆಗೂ ಕಂಪನಿಗಳಿಗೆ ಉತ್ಪಾದನಾ ಆಧರಿತ ಸಹಾಯಧನ ಸಿಗುತ್ತಿತ್ತು. ಆದರೆ ಈಗ ಆ ಮೊತ್ತ 22,628 ರೂಪಾಯಿಗೆ ಕುಸಿದಿದೆ.

ಸಹಜವಾಗಿಯೇ ಎಲೆಕ್ಟ್ರಿಕ್​ ಸ್ಕೂಟರ್​ ತಯಾರಿಕಾ ಕಂಪನಿಗಳು ಆ ಹೊರೆಯನ್ನು ಗ್ರಾಹಕರ ಮೇಲೆ ವರ್ಗಾಯಿಸಿವೆ.