ವಾಟ್ಸಾಪ್​, ಇ-ಮೇಲ್​ ಮೂಲಕ ಕಳುಹಿಸುವ ನೋಟಿಸ್​ ಮಾನ್ಯವಲ್ಲ – ಸುಪ್ರೀಂಕೋರ್ಟ್​ ರಿಜಿಸ್ಟ್ರಾರ್​​ಗಳಿಂದ ಆದೇಶ

ವಾಟ್ಸಾಪ್​ ಮತ್ತು ಇ-ಮೇಲ್​ಗಳ ಮೂಲಕ ಕಳುಹಿಸಲಾಗುವ ನೋಟಿಸ್​​ಗಳು ಕಾನೂನುಬದ್ಧವಲ್ಲ ಎಂದು ಸುಪ್ರೀಂಕೋರ್ಟ್​ ಸ್ಪಷ್ಟಪಡಿಸಿದೆ.

ವಾಟ್ಸಾಪ್​ ಮೂಲಕ ಪ್ರತಿವಾದಿಗಳಿಗೆ ಕಳುಹಿಸಲಾಗಿರುವ ನೋಟಿಸ್​ ಸುಪ್ರೀಂಕೋರ್ಟ್​ ನಿಯಮಗಳ ಪ್ರಕಾರ ಕಾನೂನುಬದ್ಧವಲ್ಲ ಮತ್ತು ಪ್ರತಿವಾದಿಗಳಿಗೆ ಹೊಸದಾಗಿ ನೋಟಿಸ್​ ಕಳುಹಿಸುವಂತೆ

ಅರ್ಜಿದಾರ ಪರ ವಕೀಲರಿಗೆ ಸುಪ್ರೀಂಕೋರ್ಟ್​ ರಿಜಿಸ್ಟ್ರಾರ್​ ಪವನೇಶ್​ ಡಿ ಅವರು ಆದೇಶದಲ್ಲಿ ತಿಳಿಸಿದ್ದಾರೆ.

ಕಚೇರಿ ವರದಿ ಪ್ರಕಾರ ಎರಡನೇ ಮತ್ತು ಮೂರನೇ ಪ್ರತಿವಾದಿಗಳಿಗೆ ಇ-ಮೇಲ್​ ಮೂಲಕ ಕಳುಹಿಸಲಾಗಿರುವ ನೋಟಿಸ್​​ ಸುಪ್ರೀಂಕೋರ್ಟ್​ ನಿಯಮಗಳ ಪ್ರಕಾರ ಮಾನ್ಯವಲ್ಲ ಮತ್ತು ಅರ್ಜಿದಾರರ ಪರ ವಕೀಲರಿಗೆ ಮುಂದಿನ ಕ್ರಮಕೈಗೊಳ್ಳಲು 2 ವಾರಗಳ ಸಮಯಾವಕಾಶ ನೀಡಲಾಗಿದೆ

ಎಂದು ರಿಜಿಸ್ಟ್ರಾರ್​ ಹೆಚ್​ ಶಶಿಧರ ಶೆಟ್ಟಿ ಅವರು ಪ್ರತ್ಯೇಕ ಆದೇಶದಲ್ಲಿ ತಿಳಿಸಿದ್ದಾರೆ.

ಸುಪ್ರೀಂಕೋರ್ಟ್​ ನಿಯಮಗಳನ್ನು ಉಲ್ಲೇಖಿಸಿ ಸುಪ್ರೀಂಕೋರ್ಟ್​ನ ರಿಜಿಸ್ಟ್ರಾರ್​​ಗಳು ನೀಡಿರುವ ಈ ಆದೇಶ ಮಹತ್ವ ಪಡೆದಿದೆ.

– 2017ರಲ್ಲಿ ದೆಹಲಿಯ ರೋಹಿಣಿ ಕೋರ್ಟ್​ ಪ್ರತಿವಾದಿಗಳಿಗೆ ವಾಟ್ಸಾಪ್​ ಮೂಲಕ ಕಳುಹಿಸಿದ್ದ ನೋಟಿಸ್​ ಮಾನ್ಯ ಎಂದು ಆದೇಶಿಸಿತ್ತು. ವಾಟ್ಸಾಪ್​ನಲ್ಲಿ ಕಳುಹಿಸಿದ್ದ ನೋಟಿಸ್​​ ತಲುಪಿದೆ ಎಂದು ಸಾಬೀತುಪಡಿಸಲು ಅರ್ಜಿದಾರ ಪರ ವಕೀಲರು ಪ್ರತಿವಾದಿಗಳ ವಾಟ್ಸಾಪ್​ನಲ್ಲಿ ಆಗಿದ್ದ ಬ್ಲೂ ಟಿಕ್​ ಮಾರ್ಕ್​ನ್ನು ದಾಖಲೆಯಾಗಿ ಸಲ್ಲಿಸಿದ್ದರು.

– 2018ರಲ್ಲಿ ಪ್ರಕರಣದಲ್ಲಿ ಬಾಂಬೆ ಹೈಕೋರ್ಟ್​ನ ಜಿ ಎಸ್​ ಪಟೇಲ್​ ಅವರು ವಾಟ್ಸಾಪ್​ ಮೂಲಕ ಕಳುಹಿಸಲಾಗಿದ್ದ ನೋಟಿಸ್​​ನ ಪಿಡಿಎಫ್​ನ್ನು ಸ್ವೀಕರಿಸದಲ್ಲದೇ ಅದನ್ನು ತೆರೆದು ನೋಡಿದ್ದಾರೆ ಎಂದು ಅಂಶವನ್ನು ಪರಿಗಣಿಸಿ ವಾಟ್ಸಾಪ್​ ಮೂಲಕ ಕಳುಹಿಸಿದ್ದ ನೋಟಿಸ್​ ಮಾನ್ಯ ಎಂದು ಅಭಿಪ್ರಾಯಪಟ್ಟಿದ್ದರು.

ದೆಹಲಿ ಹೈಕೋರ್ಟ್​, ಪಂಜಾಬ್​-ಹರಿಯಾಣ ಹೈಕೋರ್ಟ್​, ಕೇರಳ ಹೈಕೋರ್ಟ್​ಗಳು ಬೇರೆ ಬೇರೆ ಪ್ರಕರಣಗಳಲ್ಲಿ ವಾಟ್ಸಾಪ್​ ಮತ್ತು ಇ-ಮೇಲ್​ ಮೂಲಕ ಕಳುಹಿಸಲಾದ ವಾಟ್ಸಾಪ್​ ಸಂದೇಶ ಮಾನ್ಯ ಎಂದು ಆದೇಶಿಸಿದ್ದವು.​