BSNLಗೆ 89 ಸಾವಿರ ಕೋಟಿ ರೂ. ಪುನಶ್ಚೇತನದ ನೆರವು – Jio, Airtelಗೆ ಸ್ಪರ್ಧೆ ಕೊಡುತ್ತಾ ಸರ್ಕಾರಿ ಟೆಲಿಕಾಂ ಕಂಪನಿ..?

ಭಾರತ್​ ಸಂಚಾರ್​ ನಿಗಮ್​ ಲಿಮಿಟೆಡ್​ (BSNL) ಪುನಶ್ವೇತನಕ್ಕಾಗಿ ಪ್ರಧಾನಿ ನರೇಂದ್ರ ಮೋದಿ ಸರ್ಕಾರ 89,047 ಕೋಟಿ ರೂಪಾಯಿ ನೀಡುವುದಕ್ಕೆ ನಿರ್ಧರಿಸಿದೆ.

ಇವತ್ತು ಪ್ರಧಾನಿ ಮೋದಿ ಅವರ ನೇತೃತ್ವದಲ್ಲಿ ನಡೆದ ಸಂಪುಟ ಸಭೆಯಲ್ಲಿ ಈ ತೀರ್ಮಾನ ಕೈಗೊಳ್ಳಲಾಗಿದೆ.

ಈ ಮೂಲಕ ಬಿಎಸ್​ಎನ್​ಎಲ್​ನ ಒಟ್ಟು ಬಂಡವಾಳ ಪ್ರಮಾಣ 1.5 ಲಕ್ಷ ಕೋಟಿ ರೂಪಾಯಿಗಳಿಂದ 2 ಲಕ್ಷದ 10 ಸಾವಿರ ಕೋಟಿ ರೂಪಾಯಿ ಏರಿಕೆ ಆಗಲಿದೆ.

ಕೇಂದ್ರ ಸರ್ಕಾರದ ಈ ನಿರ್ಧಾರದಿಂದ ಬಿಎಸ್​ಎನ್​ಎಲ್​ ಮತ್ತೆ ಟೆಲಿಕಾಂ ಕ್ಷೇತ್ರದಲ್ಲಿ ಖಾಸಗಿ ಕಂಪನಿಗಳಾದ ರಿಲಯನ್ಸ್​ ಮತ್ತು ಏರ್​ಟೆಲ್​ಗೆ ಸ್ಪರ್ಧೆ ನೀಡುವ ಶಕ್ತಿ ಹೊಂದಲಿದೆ.

4ಜಿ ಮತ್ತು 5ಜಿ ವಲಯದಲ್ಲಿ ಬಿಎಸ್​ಎನ್​ಎಲ್​ ಇನ್ನಷ್ಟು ಬಲಗೊಳ್ಳಲಿದೆ.

2019ರಲ್ಲಿ ಬಿಎಸ್​ಎನ್​ಎಲ್​ಗೆ ಸರ್ಕಾರ 69 ಸಾವಿರ ಕೋಟಿ ರೂಪಾಯಿ ನೀಡಿತ್ತು. 2022ರಲ್ಲಿ ಬಿಎಸ್​ಎನ್​ಎಲ್​ಗೆ 1.64 ಲಕ್ಷ ಕೋಟಿ ರೂಪಾಯಿ ಮೊತ್ತದ ಪುನಶ್ಚೇತನ ನೆರವಿಗೆ ಒಪ್ಪಿಗೆ ನೀಡಿತ್ತು.

ಕೇಂದ್ರ ಸರ್ಕಾರದ ಮಾಹಿತಿ ಪ್ರಕಾರ ಈ ಹಣಕಾಸು ನೆರವುಗಳಿಂದ ಬಿಎಸ್​ಎನ್​ಎಲ್​ ಕಳೆದ ಆರ್ಥಿಕ ವರ್ಷದಿಂದ ಲಾಭದಾಯಕ ಸಂಸ್ಥೆಯಾಗಿ ಹೊರಹೊಮ್ಮಿದೆ. ಬಿಎಸ್​ಎನ್​ಎಲ್​ ಮೇಲಿದ್ದ ಸಾಲದ ಹೊರೆ 22,289  ಕೋಟಿ ರೂಪಾಯಿಗೆ ಇಳಿದಿದೆ. 

ಬಿಎಸ್​ಎನ್​ಎಲ್​ ಮಾಹಿತಿ ಪ್ರಕಾರ 2020-21ರ ಆರ್ಥಿಕ ವರ್ಷದಲ್ಲಿ 18, 595 ಕೋಟಿ ರೂಪಾಯಿ ಆದಾಯ ಗಳಿಸಿತ್ತು. ಜೊತೆಗೆ 1208.35 ಲಕ್ಷ ಚಂದಾದಾರಿದ್ದಾರೆ.