ಹೊಯ್ಸಳ ರಾಜವಂಶಸ್ಥರ ಊರಿಗೆ ಕೊನೆಗೂ ಬಂತು KSRTC ಬಸ್​ – ಶಾಸಕಿಯಾದ ತಿಂಗಳಲ್ಲೇ ನಯನ ಮೋಟಮ್ಮ ಸ್ಪಂದನೆ

ಹೊಯ್ಸಳ ರಾಜಮನೆತನದ ಮೂಲ ಊರು ಚಿಕ್ಕಮಗಳೂರು ಜಿಲ್ಲೆಯ ಮೂಡಿಗೆರೆ ಹೊಯ್ಸಳಲು ಗ್ರಾಮಕ್ಕೆ ಕೊನೆಗೂ ಸರ್ಕಾರಿ ಬಸ್​ ಬಂದಿದೆ.

ಸ್ವತಂತ್ರ ಭಾರತದ ಇತಿಹಾಸದಲ್ಲಿ ಮೊದಲ ಬಾರಿಗೆ ಈ ಊರಿಗೆ ಕೆಎಸ್​ಆರ್​ಟಿಸಿ ಬಸ್​ ಸಂಚಾರ ಆರಂಭಿಸಿದೆ.

200 ಜನರಿರುವ ಮಲೆನಾಡಿನ ಈ ಗ್ರಾಮಕ್ಕೆ ಮೂಡಿಗೆರೆ ಕೆಎಸ್​ಆರ್​ಟಿಸಿ ವಿಭಾಗದಿಂದ ಪ್ರತಿ ದಿನ ಬೆಳಗ್ಗೆ ಮತ್ತು ಸಂಜೆ ಬಸ್​ ಸಂಚಾರ ಆರಂಭವಾಗಿದೆ.

ಬಸ್​ ಸಂಚಾರ ಇಲ್ಲದೇ ಈ ಊರಿನ ಜನ ಪ್ರತಿ ದಿನ 5 ಕಿಲೋ ಮೀಟರ್​ ನಡೆದುಕೊಂಡೇ ಹೋಗ್ಬೇಕಿತ್ತು ಅಥವಾ ಆಟೋಗಳನ್ನು ಅಲವಂಬಿಸಬೇಕಿತ್ತು.

ಮೂಡಿಗೆರೆ ಶಾಸಕಿ ಆಗಿ ಆಯ್ಕೆಯಾಗಿರುವ ನಯನ ಮೋಟಮ್ಮ ಅವರಿಗೆ ಈ ಭಾಗದ ಜನ ಮನವಿ ಸಲ್ಲಿಸಿದ ಬಳಿಕ ಶಾಸಕಿಯವರ ವಿಶೇಷ ಸ್ಪಂದನೆಯಿಂದ ಊರಿಗೆ ಬಸ್​ ಭಾಗ್ಯ ಸಿಕ್ಕಿದೆ.

ತಮ್ಮೂರಿಗೆ ಬಂದ ಮೊದಲ ಕೆಎಸ್​ಆರ್​ಟಿಸಿ ಬಸ್​ಗೆ ಪೂಜೆ ಸಲ್ಲಿಸಿದ ಗ್ರಾಮಸ್ಥರು ಖುಷಿಯಿಂದಲೇ ಬಸ್​ನಲ್ಲಿ ಪ್ರಯಾಣಿಸಿದರು.

ಈ ವೇಳೆ ಕೆಎಸ್​ಆರ್​ಟಿಸಿ ಡಿಪೋ ಮ್ಯಾನೇಜರ್​ ಸೋಮಶೇಖರ್​, ತಾಲೂಕು ಯುವ ಕಾಂಗ್ರೆಸ್​ ಅಧ್ಯಕ್ಷ ದೀಕ್ಷಿತ್​ ಇದ್ದರು.

ಕಳೆದ 19 ವರ್ಷಗಳಲ್ಲಿ 15 ವರ್ಷದ ಎಂ ಪಿ ಕುಮಾರಸ್ವಾಮಿ ಬಿಜೆಪಿ ಶಾಸಕರಾಗಿದ್ದರು. ಆದರೂ ಊರಿಗೆ ಬಸ್​​ ವ್ಯವಸ್ಥೆ ಮಾಡಲು ಆಗಿರಲಿಲ್ಲ.

ಆದರೆ ನಯನ ಮೋಟಮ್ಮ ಮೊದಲ ಬಾರಿಗೆ ಶಾಸಕಿ ಆದ ಕೇವಲ 1 ತಿಂಗಳ ಅವಧಿಯಲ್ಲೇ ಬಸ್​ ವ್ಯವಸ್ಥೆ ಮಾಡಿದ್ದು ಗ್ರಾಮಸ್ಥರ ಪ್ರಶಂಸೆಗೆ ಪಾತ್ರವಾಗಿದೆ.

ಮಹಿಳೆಯರಿಗೆ ಉಚಿತ ಪ್ರಯಾಣ ಯೋಜನೆ ಶುರುವಾದ ಬಳಿಕ ಹಲವು ಹಳ್ಳಿಗಳಿಗೆ ಸರ್ಕಾರಿ ಬಸ್​ಗಳ ಓಡಾಟ ಇಲ್ಲ ಎನ್ನುವುದನ್ನು ಮುಂದಿಟ್ಟುಕೊಂಡು ವಿಪಕ್ಷ ಬಿಜೆಪಿ ಕಾಂಗ್ರೆಸ್​ ಸರ್ಕಾರಕ್ಕೆ ಮೊಟಕಿತ್ತು.