68 ವರ್ಷದ ಹಿರಿಯ ವಕೀಲ ಹರೀಶ್​ ಸಾಳ್ವೆ ಮೂರನೇ ಮದುವೆ

ದೇಶದ ಅತ್ಯಂತ ದುಬಾರಿ ವಕೀಲ ಎಂದೇ ಖ್ಯಾತಿ ಪಡೆದಿರುವ ಸುಪ್ರೀಂಕೋರ್ಟ್​​ನ ಹಿರಿಯ ವಕೀಲ ಹರೀಶ್​ ಸಾಳ್ವೆ ಅವರು ತಮ್ಮ 68ನೇ ಇಳಿವಯಸ್ಸಿನಲ್ಲಿ ಮೂರನೇ ಮದುವೆ ಆಗಿದ್ದಾರೆ.

ಬ್ರಿಟನ್​ ರಾಜಧಾನಿ ಲಂಡನ್​ನಲ್ಲಿ ಬ್ರಿಟನ್​ ಪ್ರಜೆಯಾಗಿರುವ ಟ್ರಿನಾ ಅವರನ್ನು ಹರೀಶ್​ ಸಾಳ್ವೆ ಭಾನುವಾರ ಮದುವೆ ಆಗಿದ್ದಾರೆ.

ಲಂಡನ್​ನಲ್ಲಿ ನಡೆದ ಹರೀಶ್​ ಸಾಳ್ವೆ ಅವರ ಈ ಮೂರನೇ ಮದುವೆಯಲ್ಲಿ ವಿಶ್ವದ ದೈತ್ಯ ಉದ್ಯಮಿ ಮುಖೇಶ್​ ಅಂಬಾನಿ ಅವರ ಪತ್ನಿ ನಿತಾ ಅಂಬಾನಿ, ಭಾರತ ಬಿಟ್ಟು ಲಂಡನ್​ಗೆ ಓಡಿಹೋಗಿರುವ ಐಪಿಎಲ್​​ನ ಮಾಜಿ ಮುಖ್ಯಸ್ಥ ಲಲಿತ್​ ಮೋದಿ, ವಿಶ್ವದ ದೊಡ್ಡ ಉಕ್ಕು ಉದ್ಯಮಿ ಲಕ್ಷ್ಮೀ ಮಿತ್ತಲ್​ ಒಳಗೊಂಡಂತೆ ಹಲವರು ಮದುವೆ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು ಎಂದು ವರದಿಯಾಗಿದೆ.

2020ರಲ್ಲಿ ಹರೀಶ್​ ಸಾಳ್ವೆ ಅವರು ತಮ್ಮ ಮೊದಲ ಪತ್ನಿ ಮೀನಾಕ್ಷಿ ಅವರಿಗೆ ವಿಚ್ಛೇಧನ ನೀಡಿದ್ದರು. ಆ ಬಳಿಕ 2020ರಲ್ಲೇ ಬ್ರಿಟನ್​ ಮೂಲದ ಕಲಾವಿದೆ 56 ವರ್ಷದ ಕರೋಲಿನಾರನ್ನು ಸಾಳ್ವೆ ಮದುವೆ ಆಗಿದ್ದರು. ಎರಡನೇ ಪತ್ನಿಯಿಂದಲೂ ದೂರ ಆಗಿರುವ ಹರೀಶ್​ ಸಾಳ್ವೆ ಲಂಡನ್​ನಲ್ಲಿ ಮೂರನೇ ಮದುವೆಯಾಗಿದ್ದಾರೆ.

ಮಹಾರಾಷ್ಟ್ರ ಮೂಲದ ಹರೀಶ್​ ಸಾಳ್ವೆ ಅವರು ಮಾಹಿತಿಗಳ ಪ್ರಕಾರ ಕರೋಲಿನಾ ಜೊತೆಗೆ ಎರಡನೇ ಮದುವೆ ಆಗುವುದಕ್ಕೂ ಮೊದಲು ಕ್ರಿಶ್ಚಿಯನ್​ ಧರ್ಮಕ್ಕೆ ಮತಾಂತರಗೊಂಡಿದ್ದರು.

ಶನಿವಾರವಷ್ಟೇ ಪ್ರಧಾನಿ ನರೇಂದ್ರ ಮೋದಿ ಸರ್ಕಾರ ಹರೀಶ್​ ಸಾಳ್ವೆ ಅವರನ್ನು ಒಂದೇ ದೇಶ ಒಂದೇ ಚುನಾವಣೆ ಸಂಬಂಧ ಅಧ್ಯಯನ ನಡೆಸುವ ಸಮಿತಿಗೆ ಸದಸ್ಯರನ್ನಾಗಿ ನೇಮಕ ಮಾಡಿತ್ತು.

ನಟ ಸಲ್ಮಾನ್​ ವಿರುದ್ಧದ ಹಿಟ್​ ಅಂಡ್​ ರನ್​ ಪ್ರಕರಣ, ರಿಲಯನ್ಸ್​ ವ್ಯಾಜ್ಯಗಳು, ಟಾಟಾ-ಸೈರಸ್​​ ಮಿಸ್ತ್ರಿ ನಡುವಿನ ಉದ್ಯಮ ಕಲಹ, ವೋಡಾಫೋನ್​ ತೆರಿಗೆ ಪ್ರಕರಣ ಹೀಗೆ ಪ್ರಮುಖ ವ್ಯಾಜ್ಯಗಳಲ್ಲಿ ಹರೀಶ್​ ಸಾಳ್ವೆ ಅವರು ವಾದಿಸಿದ್ದರು.

ಕುಲಭೂಷಣ್​ ಯಾದವ್​ ಪ್ರಕರಣದಲ್ಲಿ ಭಾರತ ಸರ್ಕಾರದ ಪರ ಅಂತಾರಾಷ್ಟ್ರೀಯ ನ್ಯಾಯಾಲಯದಲ್ಲಿ ಹಾಜರಾಗಿ ಕೇವಲ 1 ರೂಪಾಯಿ ಶುಲ್ಕ ಪಡೆಯುವ ಮೂಲಕ ಸುದ್ದಿಯಾಗಿದ್ದರು.