ದೇವೇಗೌಡರ ಕುಟುಂಬದ ಮೈಂಡ್​ ಗೇಮ್​ – ಶರಣಾಗತಿಯೋ..? ಶರಣಾಗತಿಗೂ ಮೊದಲೇ ಪ್ರಜ್ವಲ್​ ಅರೆಸ್ಟೋ..?

ಸಾಮೂಹಿಕ ಲೈಂಗಿಕ ಹಗರಣದಲ್ಲಿ ಆರೋಪಿಯಾಗಿರುವ ಹಾಸನ ಲೋಕಸಭಾ ಕ್ಷೇತ್ರದ ಸಂಸದ ಪ್ರಜ್ವಲ್​ ರೇವಣ್ಣ ಜೂನ್​ 1ರಂದು ಬೆಳಗ್ಗೆ 10 ಗಂಟೆಗೆ ವಿಶೇಷ ತನಿಖಾ ತಂಡದ ಎದುರು ವಿಚಾರಣೆಗೆ ಹಾಜರಾಗಲಿದ್ದಾರೆ.

ಸೋಮವಾರ ಬಿಡುಗಡೆ ಮಾಡಿರುವ ವೀಡಿಯೋ ಸಂದೇಶದಲ್ಲಿ ತಾವು ಶನಿವಾರದಂದು ವಿಚಾರಣೆಗೆ ಹಾಜರಾಗುವ ಬಗ್ಗೆ ಅತ್ಯಾಚಾರ ಪ್ರಕರಣದ ಆರೋಪಿ ಪ್ರಜ್ವಲ್ ಸ್ವಯಂ ಘೋಷಣೆ ಮಾಡಿಕೊಂಡಿದ್ದಾರೆ.

ಪ್ರಜ್ವಲ್​ ವಿಚಾರಣೆಗೆ ಹಾಜರಾಗುವುದಕ್ಕೂ 4 ದಿನ ಮೊದಲು ಅಂದರೆ ಮಂಗಳವಾರ ಎಸ್​ಐಟಿ ಪೊಲೀಸರು ಹಾಸನದಲ್ಲಿರುವ ಸಂಸದರ ನಿವಾಸದಲ್ಲಿ ಸಾಕ್ಷ್ಯ ಸಂಗ್ರಹಿಸಿದ್ದಾರೆ. ವಿಧಿವಿಜ್ಞಾನ ಪ್ರಯೋಗಾಲಯ ಸಮೇತ ಎಸ್​ಐಟಿ ಸಂಸದರ ಮನೆಯಲ್ಲಿ ಸಾಕ್ಷ್ಯ ಸಂಗ್ರಹಿಸಿದೆ.

ಇವತ್ತು ನಸುಕಿನ ಜಾವ 4 ಗಂಟೆಗೆ ಸಾಕ್ಷ್ಯ ಸಂಗ್ರಹ ಪ್ರಕ್ರಿಯೆ ಮುಕ್ತಾಯವಾಗಿದೆ. ಸಾಕ್ಷ್ಯದ ಭಾಗವಾಗಿ ಪ್ರಜ್ವಲ್​ ಬಳಸ್ತಿದ್ದ ಹಾಸಿಗೆ, ದಿಂಬು, ಹೊದಿಕೆ ಸೇರಿದಂತೆ ಸಂಸದರು ಬಳಸ್ತಿದ್ದ ಹಲವು ವಸ್ತುಗಳನ್ನು ವಶಪಡಿಸಿಕೊಂಡು ಬೆಂಗಳೂರಿಗೆ ಕೊಂಡೊಯ್ದಿದೆ.

ಪ್ರಜ್ವಲ್​ ವಿರುದ್ಧ ದಾಖಲಾಗಿರುವ ಮೂರು ಎಫ್​ಐಆರ್​ಗಳ ಪೈಕಿ ಒಂದು ಎಫ್​ಐಆರ್​ನಲ್ಲಿ ಹಾಸನ ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿಗಳ ಕಚೇರಿ ಪಕ್ಕದಲ್ಲೇ ಇರುವ ಸಂಸದರ ನಿವಾಸದಲ್ಲಿ ಪ್ರಜ್ವಲ್​ ತಮ್ಮ ಮೇಲೆ ನಿರಂತರ ಅತ್ಯಾಚಾರ ಎಸಗಿದ್ದಾರೆ ಎಂದು ಮಹಿಳೆಯೊಬ್ಬರು ಆರೋಪಿಸಿದ್ದಾರೆ.

ತಾತ ಹೆಚ್​ ಡಿ ದೇವೇಗೌಡ ಅವರಿಗೆ ಸರ್ಕಾರದಿಂದ ನೀಡಲಾಗಿದ್ದ ಬಂಗಲೆಯನ್ನೂ ಕಾಮಕೃತ್ಯಗಳಿಗೆ ಪ್ರಜ್ವಲ್​ ದುರುಪಯೋಗಪಡಿಸಿಕೊಂಡಿದ್ದಾರೆ ಎಂಬ ಆರೋಪವೂ ಇದೆ.

ವಿಮಾನದ ಟಿಕೆಟ್​ ಬುಕ್​:

ಜೂನ್​ 1ರಂದು ಶನಿವಾರ ಬೆಳಗ್ಗೆ ಎಸ್​ಐಟಿ ಮುಂದೆ ಹಾಜರಾಗುವುದಾಗಿ ಪ್ರಜ್ವಲ್​ ಘೋಷಿಸಿಕೊಂಡಿರುವ ಹಿನ್ನೆಲೆಯಲ್ಲಿ ಜರ್ಮನಿಯ ಮ್ಯೂನಿಚ್​ ನಗರದಿಂದ ಬೆಂಗಳೂರಿನ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬರುವುದಕ್ಕಾಗಿ ಮೇ 31ಕ್ಕೆ ಲುಫ್ತಾನಾ ಏರ್​ಲೈನ್ಸ್​ನಲ್ಲಿ ಟಿಕೆಟ್​ ಬುಕ್​ ಮಾಡಿದ್ದಾರೆ ಎಂಬ ಮಾಹಿತಿ ಇದೆ.

ಶರಣಾಗತಿಗೂ ಮೊದಲೇ ಬಂಧನ..?

ಎಸ್​​ಐಟಿ ಮುಂದೆ ಜೂನ್​ 1ರಂದು ಪ್ರಜ್ವಲ್​ ರೇವಣ್ಣ ಶರಣಾಗಲು ಸಿದ್ಧತೆ ಮಾಡಿಕೊಂಡಿದ್ದಾರೆ. ಇದುವರೆಗೆ ಮೂರು ಅತ್ಯಾಚಾರ ಪ್ರಕರಣಗಳಲ್ಲೂ ಪ್ರಜ್ವಲ್​ ಮೊದಲನೇ ಆರೋಪಿ.

ಏಪ್ರಿಲ್​ 28ರಂದು ಎಸ್​ಐಟಿ ಮೊದಲನೇ ಎಫ್​ಐಆರ್​ ದಾಖಲಿಸಿದ ಬಳಿಕ ಪ್ರಜ್ವಲ್​ ನಾಪತ್ತೆಯಾಗಿದ್ದು, ಆ ಕಾರಣ ಪ್ರಜ್ವಲ್​ ಬಂಧಿಸಲಾಗದೇ ಮೇ 1ರಂದು ವಿಚಾರಣೆಗೆ ಹಾಜರಾಗುವಂತೆ ಎಸ್​ಐಟಿ ಪ್ರಜ್ವಲ್​​ಗೆ ಸಮನ್ಸ್​ ನೀಡಿತ್ತು.

ಆದರೆ ಮೇ 1ರಂದು ತಮ್ಮ ವಕೀಲರ ಮೂಲಕ ಎಸ್​ಐಟಿಗೆ ಉತ್ತರಿಸಿದ್ದ ಪ್ರಜ್ವಲ್​ ತಾವು ಹೊರಗಡೆ ಪ್ರವಾಸದಲ್ಲಿರುವ ಕಾರಣ ವಿಚಾರಣೆಗೆ ಹಾಜರಾಗಲು 1 ವಾರ ಸಮಯ ಕೇಳಿದ್ದರು. ಆದರೆ ಆ ಒಂದು ವಾರ ಕಳೆದ ಬಳಿಕವೂ ಪ್ರಜ್ವಲ್​ ಎಸ್​ಐಟಿ ಎದುರು ಹಾಜರಾಗಲಿಲ್ಲ.

ನಾಪತ್ತೆಯಾಗಿದ್ದ ಹಿನ್ನೆಲೆಯಲ್ಲಿ ಪ್ರಜ್ವಲ್​ ವಿರುದ್ಧ ಮೇ 4ರ ವೇಳೆಗೆ ಎಸ್​ಐಟಿ ಎರಡನೇ ಲುಕ್​​ಔಟ್​ ನೋಟಿಸ್​ ಹೊರಡಿಸಿತ್ತು.

ಇತ್ತ, ಎಸ್​ಐಟಿ ಪೊಲೀಸರ ಮನವಿ ಮೇರೆಗೆ ಕೇಂದ್ರೀಯ ತನಿಖಾ ದಳ (ಸಿಬಿಐ) ಪ್ರಜ್ವಲ್​ ರೇವಣ್ಣ ವಿರುದ್ಧ ಇಂಟರ್​ಪೋಲ್​ ಮೂಲಕ ಮೇ 7ರಂದು ಬ್ಲೂ ಕಾರ್ನರ್​ ನೋಟಿಸ್​ ಹೊರಡಿಸಲಾಗಿತ್ತು.

ಬ್ಲೂ ಕಾರ್ನರ್​ ನೋಟಿಸ್​​ ಪ್ರಕಾರ ಪ್ರಜ್ವಲ್​ ಎಲ್ಲಿದ್ದಾನೆ..? ಎಂಬುದನ್ನು ಪತ್ತೆ ಹಚ್ಚಿ ಇಷ್ಟೊತ್ತಿಗಾಗಲೇ ಇಂಟರ್​ಪೋಲ್​ ಪತ್ತೆ ಹಚ್ಚಿ ಸಿಬಿಐ ಮೂಲಕ ಎಸ್​ಐಟಿಗೆ ಮಾಹಿತಿ ನೀಡ್ಬೇಕಿತ್ತು.

ಬ್ಲೂ ಕಾರ್ನರ್​ ನೋಟಿಸ್​ ಅಡಿಯಲ್ಲಿ ಸದಸ್ಯ ರಾಷ್ಟ್ರಕ್ಕೆ ಬೇಕಾಗಿರುವ ವ್ಯಕ್ತಿಯ ಗುರುತು ಮತ್ತು ಆತ ಎಲ್ಲಿದ್ದಾನೆ ಎಂಬ ಮಾಹಿತಿಯನ್ನು ಸಂಗ್ರಹಿಸಿ ಆ ಸದಸ್ಯ ರಾಷ್ಟ್ರಕ್ಕೆ ನೀಡಲಾಗುತ್ತದೆ. ಆ ಮಾಹಿತಿ ಆಧರಿಸಿ ಆ ದೇಶ ಆ ಆರೋಪಿಯ ಗಡೀಪಾರಿಗೆ ಆತ ಉಳಿದುಕೊಂಡಿರುವ ದೇಶಕ್ಕೆ ಮನವಿ ಸಲ್ಲಿಸಬಹುದು.

ಆದರೆ ಇಂಟರ್​ಪೋಲ್​ ಪ್ರಜ್ವಲ್​ ಎಲ್ಲಿದ್ದಾನೆ ಎಂದು ಗುರುತು ಪತ್ತೆ ಹಚ್ಚುವ ಮೊದಲೇ ವೀಡಿಯೋ ಬಿಡುಗಡೆಗೊಳಿಸಿ ತಾನು ಜೂನ್​ 1ರಂದು ವಿಚಾರಣೆಗೆ ಹಾಜರಾಗುವುದಾಗಿ ಹೇಳಿದ್ದಾನೆ.

ಬೆಂಗಳೂರಿಗೆ ಬರ್ತಿದ್ದಂತೆ ಅರೆಸ್ಟ್​..?

ಲುಕ್​ಔಟ್​ ನೋಟಿಸ್​ನ ಪ್ರಕಾರ ಬೇಕಾಗಿರುವ ಆರೋಪಿ ಒಂದು ವೇಳೆ ವಿಮಾನ ನಿಲ್ದಾಣ, ಬಂದರು ಅಥವಾ ರಸ್ತೆ ಮೂಲಕ ವಿದೇಶಕ್ಕೆ ಓಡಿಹೋಗುವ ಸುಳಿವು ಇದ್ದಲ್ಲಿ ಆತನನ್ನು ವಶಕ್ಕೆ ಪಡೆದು ತನಿಖಾ ಸಂಸ್ಥೆಗೆ ಒಪ್ಪಿಸಬೇಕು.

ಪ್ರಜ್ವಲ್​ ವಿರುದ್ಧದ ಲುಕ್​ಔಟ್​ ನೋಟಿಸ್​ ಅಥವಾ ಬ್ಲೂ ಕಾರ್ನರ್​ ನೋಟಿಸ್​​ನ್ನು ವಾಪಸ್​ ಪಡೆದಿಲ್ಲ. ಹೀಗಾಗಿ ಬೆಂಗಳೂರಿನ ವಿಮಾನ ನಿಲ್ದಾಣಕ್ಕೆ ಬಂದಿಳಿಯುತ್ತಿದ್ದಂತೆ ಎಸ್​ಐಟಿ ಪ್ರಜ್ವಲ್​ನ್ನು ಬಂಧಿಸಿದರೂ ಅಚ್ಚರಿಯಿಲ್ಲ.

ಆದರೆ ದೇವೇಗೌಡರ ಕುಟುಂಬ ಇಲ್ಲೊಂದು ಮೈಂಡ್​ ಗೇಮ್​ ಆಡ್ತಿದೆ. ಮೇ 23ರಂದು ತಾತ ದೇವೇಗೌಡರು ಎಸ್​ಐಟಿ ಎದುರು ಶರಣಾಗುವಂತೆ ಎಚ್ಚರಿಕೆ ಕೊಟ್ಟು ಪತ್ರ ಬರೆದಿದ್ದರು. ಆ ಪತ್ರದ ಐದು ದಿನಗಳ ಬಳಿಕ ಸಾಮೂಹಿಕ ಅತ್ಯಾಚಾರದ ಆರೋಪಿಯಾಗಿರುವ ಪ್ರಜ್ವಲ್​ ವೀಡಿಯೋ ಸಂದೇಶ ಬಿಡುಗಡೆ ಮಾಡಿದ್ದರು.

ಒಂದು ವೇಳೆ ಎಸ್​ಐಟಿ ಬಂಧನಕ್ಕೂ ಮೊದಲೇ ಕೈಗೆ ಸಿಗದೇ ನೇರವಾಗಿ ಹೋಗಿ ಮೊದಲೇ ಹೇಳಿದಂತೆ ವಿಚಾರಣೆ ಹಾಜರಾಗುವ ನೆಪದಲ್ಲಿ ಶರಣಾದರೆ ಅದನ್ನು ದೇವೇಗೌಡರು, ಕುಮಾರಸ್ವಾಮಿ ಮತ್ತು ಹೆಚ್​ ಡಿ ರೇವಣ್ಣ ಆದಿಯಾಗಿ ಬಿಜೆಪಿ ನಾಯಕರೂ ಒಳಗೊಂಡಂತೆ ವಿಪಕ್ಷ ಬಣ ತಮ್ಮ ನೈತಿಕ ಗೆಲುವು ಎಂದು ಬಿಂಬಿಸಿಕೊಳ್ಳುವುದರಲ್ಲಿ ತಪ್ಪಿಲ್ಲ.

ಪ್ರಜ್ವಲ್​ ಶರಣಾದ ಬಳಿಕ ಎಸ್​ಐಟಿ ಬಂಧಿಸಿದರೆ ಅದು ಎಸ್​ಐಟಿ ತನಿಖೆ ಎಷ್ಟರ ಮಟ್ಟಿಗೆ ಬಿಗಿಯಾಗಿದೆ, ಪಾರದರ್ಶಕವಾಗಿದೆ ಎನ್ನುವುದರ ಮೇಲೆ ಅನುಮಾನ ಸೃಷ್ಟಿಸುತ್ತದೆ. ಅಷ್ಟೇ ಅಲ್ಲ, ಪ್ರಜ್ವಲ್​ ಕಾಮಕೃತ್ಯಕ್ಕೆ ಬಲಿಯಾಗಿರುವ ಅದೆಷ್ಟೋ ಹೆಣ್ಮಕ್ಕಳು ತಮಗಾದ ಅನ್ಯಾಯದ ವಿರುದ್ಧ ಎಸ್​ಐಟಿಗೆ ಮೊರೆ ಹೋಗುವ ನೈತಿಕ ಸ್ಥೈರ್ಯ ಕಳೆದುಕೊಳ್ಳುತ್ತಾರೆ.

ಓಡಿಹೋಗಿರುವ ಪ್ರಜ್ವಲ್​ ಬೆಂಗಳೂರಿಗೆ ಬರ್ತಿದ್ದಂತೆ ಎಸ್​ಐಟಿ ಬಂಧಿಸಿದರೆ ಅದು ಅಪ್ಪ-ಮಕ್ಕಳ ದೌರ್ಜನ್ಯ ವಿರುದ್ಧದ ತನಿಖೆಯ ಮೇಲೆ ಜನರ ವಿಶ್ವಾಸವನ್ನು ಹೆಚ್ಚಿಸಬಹುದು, ದೌರ್ಜನ್ಯಕ್ಕೊಳಗಾದವರಿಗೆ ತಮ್ಮಗಾದ ಅನ್ಯಾಯ ಹೇಳಿಕೊಳ್ಳಲು ನೈತಿಕ ಧೈರ್ಯ ತುಂಬಬಹುದು.

ಇಂಥ ದಿನವೇ ವಿಚಾರಣೆಗೆ ಬರುವುದಾಗಿ ಎಂದು ಸ್ವತಃ ಪ್ರಜ್ವಲ್​ ದಿನ, ಸಮಯ ಹೇಳಿರುವ ಕಾರಣ ಎಸ್​ಐಟಿಗೆ ಶರಣಾಗತಿಗೂ ಮೊದಲೇ ಪ್ರಜ್ವಲ್​ ಬಂಧನ ಕಷ್ಟವೇನಲ್ಲ, ಮನಸ್ಸು ಮಾಡಬೇಕಷ್ಟೇ.