ಇನ್ಸ್ಟಾಗ್ರಾಂ ಸಾಮಾಜಿಕ ಜಾಲತಾಣದಲ್ಲಿ ಲೆಸ್ಬಿಯನ್ ಆಗಿ ನಟಿಸಿ ವಿದ್ಯಾರ್ಥಿನಿಯರನ್ನು ಬ್ಲಾಕ್ ಮೇಲ್ ಮಾಡುತ್ತಿದ್ದ ಬೆಂಗಳೂರಿನ 21 ವರ್ಷದ ಬಿ.ಎಸ್.ಸಿ ವಿದ್ಯಾರ್ಥಿಯನ್ನು ಇಂದು ಶುಕ್ರವಾರ (ಜ.14) ಬೆಂಗಳೂರು ಪೊಲೀಸರು ಬಂಧಿಸಿದ್ದಾರೆ.
ಪ್ರಪಂಚ್ ನಾಚಪ್ಪ ಬಂಧಿತನಾಗಿರುವ ವಿದ್ಯಾರ್ಥಿ. ಬೆಂಗಳೂರಿನ ಪ್ರೆಸರ್ ಟೌನ್ನ ನಿವಾಸಿಯಾಗಿರುವ ಈತ 2021 ರ ಸೆಪ್ಟಂಬರ್ನಲ್ಲಿ ಪ್ರತಿಕ್ಷಾ ಬೋಹ್ರಾ ಹೆಸರಿನಲ್ಲಿ ನಕಲಿ ಇನ್ಸ್ಟಾಗ್ರಾಂ ಖಾತೆ ತೆರೆದಿದ್ದ.
ಈತ ಲೆಸ್ಬಿಯನ್ನಂತ ನಟಿಸಿ ಯುವತಿಯರನ್ನು ಹುಡುಕುತ್ತಿದ್ದ. ಮಹಿಳೆಯರು ವಿಶೇಷವಾಗಿ ವಿದ್ಯಾರ್ಥಿನಿಯರೊಂದಿಗೆ ಚಾಟಿಂಗ್ ಮಾಡುತ್ತಾ, ಅವರಿಗೆ ನಂಬಿಕೆ ಬಂದ ಮೇಲೆ ಬೆತ್ತಲೆ ಫೋಟೋಗಳನ್ನು ಹಾಕಿಸಿಕೊಳ್ಳುತ್ತಿದ್ದ. ಅನಂತರ ಆ ಯುವತಿಯರನ್ನು ಬ್ಲಾಕ್ಮೇಲ್ ಮಾಡುತ್ತಿದ್ದ. ಹಣ ನೀಡದೇ ಇದ್ದರೆ ಫೋಟೋಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಅಪ್ಲೋಡ್ ಮಾಡುವ ಬೆದರಿಕೆ ಹಾಕುತ್ತಿದ್ದ.
ಪೊಲೀಸರ ಮಾಹಿತಿ ಪ್ರಕಾರ ನಾಚಪ್ಪ ತಾನು ಮಾಡೆಲ್ ಆಗಿದ್ದು, ಮಾಡಲ್ ಆಗುವವರಿಗೆ ಸಹಾಯ ಮಾಡುತ್ತೇನೆ ಎಂದು ಸಂತ್ರಸ್ತರಿಗೆ ಪರಿಚಯ ಮಾಡಿಕೊಳ್ಳುತ್ತಿದ್ದ. 30 ರಿಂದ 40 ಸಂತ್ರಸ್ತರಿಂದ ಸುಮಾರು 2 ಲಕ್ಷದವರೆಗೆ ವಸೂಲಿ ಮಾಡಿದ್ದಾನೆ ಎಂದು ಹೇಳಿದ್ದಾರೆ. ನಿಖರ ಹಣದ ಮಾಹಿತಿಗಾಗಿ ಪೊಲೀಸರು ಈತನ ಬ್ಯಾಂಕ್ ಖಾತೆಯನ್ನು ಪರಿಶೀಲಿಸುತ್ತಿದ್ದಾರೆ.
ಈ ಬಗ್ಗೆ ತನಿಖೆ ನಡೆಸುತ್ತಿರುವ ಪೊಲೀಸರೊಬ್ಬರು ಮಾತನಾಡಿ, ನಾಚಪ್ಪ ಸಾಮಾಜಿಕ ಜಾಲತಾಣದಲ್ಲಿ ಲೆಸ್ಬಿಯನ್ನಂತೆ ನಟಿಸಿ ಯುವತಿಯರನ್ನು ಬಲೆಗೆ ಹಾಕಿಕೊಳ್ಳುತ್ತಿದ್ದ. ಅನಂತರ ಅವರ ಬೆತ್ತಲೆ ಫೋಟೋಗಳನ್ನು ಪಡೆದುಕೊಂಡು ಹಣಕ್ಕಾಗಿ ಬೆದರಿಕೆ ಹಾಕುತ್ತಿದ್ದ ಎಂದು ಹೇಳಿದ್ದಾರೆ.
ಯುವತಿಯೊಬ್ಬಳು ನೀಡಿದ ದೂರಿನ ಮೇರೆಗೆ ಪೊಲೀಸರು ಆರೋಪಿ ಪ್ರಪಂಚ್ ನಾಚಪ್ಪನನ್ನು ಬಂಧಿಸಿದ್ದಾರೆ. ಈತನ ಬಗ್ಗೆ ಇನ್ನು ವಿಚಾರಣೆ ನಡೆಸಲಾಗುತ್ತಿದೆ.
