ರಕ್ಷಿತ್ ಶೆಟ್ಟಿಯ ‘777 ಚಾರ್ಲಿ’ ಸಿನೆಮಾಗೆ ಫುಲ್ ಮಾರ್ಕ್ಸ್​ – ಬಾಲ್ಯದ ಪ್ರಾಣಿ ಪ್ರೀತಿ ನೆನೆದ ‘ಪರಮೇಶ್ವರ್ ಗುಂಡ್ಕಲ್’

                ಮಲೆನಾಡಿನ ಒಂದು ಮಳೆಗಾಲದ ಬೆಳಿಗ್ಗೆ ಹುಲ್ಲು ಮೇಯಲು ಹೋದ ಗೌರಿ ಮತ್ತು ಕಾಳಿ ಸಂಜೆ ವಾಪಸ್ ಬರಲಿಲ್ಲ. ನಮಗೆಲ್ಲಾ ಆತಂಕ. ಜಿನುಗುತ್ತಿರುವ ಮಳೆ. ಕತ್ತಲು. ಟಾರ್ಚ್ ಹಿಡಿದುಕೊಂಡು ರಾತ್ರಿಯೆಲ್ಲಾ ಬೆಟ್ಟ ಗುಡ್ಡ ಹುಡುಕಿದೆವು. ಕಣಿವೆಯೊಂದರಲ್ಲಿ ಆಕಳೊಂದು ಬಿದ್ದಿರುವುದನ್ನು ನೋಡಿರುವುದಾಗಿ ದಾರಿಯಲ್ಲಿ ಸಿಕ್ಕಿದ ಕೆಲಸದವನೊಬ್ಬ ಹೇಳಿದ. ಗೌರಿಯನ್ನು ತುಂಬಾ ಇಷ್ಟಪಡುತ್ತಿದ್ದ ನನಗೆ ಬಿದ್ದಿರುವ ಆಕಳು ಕಾಳಿ ಆಗಿರಲಿ ಅಂತ ತುಂಬಾ ಅನಿಸಿತ್ತು. ಆದರೆ ಬಿದ್ದಿರುವುದು ಗೌರಿ ಎಂದು ಹೋಗಿ ನೋಡಿದಾಗ ಗೊತ್ತಾಯಿತು. ಗೌರಿ ನಮ್ಮನ್ನು ಬಿಟ್ಟು ಹೋಗಿದ್ದಳು. ಮನಸಲ್ಲೇ ಕಾಳಿಯನ್ನು ಮುಗಿಸಿಯಾಗಿತ್ತು. ಗೌರಿಯ ವಿದಾಯ, ಮನಸಲ್ಲೇ ನಡೆಸಿದ ಗೋಹತ್ಯೆಯಿಂದ ಹುಟ್ಟಿಕೊಂಡ ಪಾಪಪ್ರಜ್ಞೆಯಿಂದ ಆ ರಾತ್ರಿ ಇಡೀ ನಿದ್ದೆ ಬರಲಿಲ್ಲ! ಈ ಘಟನೆ ಎದೆಯ ಆಳದ ತನಕ ಮಾಡಿದ ಗಾಯ ಎಷ್ಟೋ ವರ್ಷಗಳ ನಂತರ ಇನ್ನೂ ಹಾಗೇ ಇದೆ. ಇದಾದ ಮೇಲೆ ಯಾವ ಪ್ರಾಣಿಯನ್ನೂ ಮನಸ್ಸಿಗೆ ಹಚ್ಚಿಕೊಂಡು ಪ್ರೀತಿ ಮಾಡುವುದು ಸಾಧ್ಯವಾಗಲಿಲ್ಲ!

          ನಾಯಿಯ ಜೊತೆ ಮಾಡಿದ ಸಿನಿಮಾ ಚಾರ್ಲಿಯನ್ನು ನೋಡುವುದಕ್ಕೆ ರಕ್ಷಿತ್ ಶೆಟ್ಟಿಯವರು ಕರೆದಾಗ ಈ ಗಾಯ ಮಾಡಿದ ನೋವು ನೆನಪಾಯಿತು. ಸಾಕು ಪ್ರಾಣಿಗಳನ್ನು ಅಷ್ಟಾಗಿ ಇಷ್ಟಪಡದೇ ಇರುವುದರಿಂದ ಸಿನಿಮಾ ಹೇಗನಿಸುತ್ತದೋ ಎಂಬ ಗೊಂದಲ. ಆದರೆ ಚಾರ್ಲಿ ಸಿನಿಮಾ ಕೊಟ್ಟಿದ್ದು ಒಂದು ಹಿತವಾದ ಅನುಭವ. ಮನಸ್ಸನ್ನು ತೀವ್ರವಾಗಿ ಅಲ್ಲಾಡಿಸುವ ಯಾವುದೇ ಕತೆ ಒಳ್ಳೆಯದಾಗಿರಲೇ ಬೇಕು!

        ಕಿರಣ್ ರಾಜ್ ಎಂಬ ಕತೆಗಾರ, ನಿರ್ದೇಶಕ ಕನ್ನಡದಲ್ಲಿ ಅತ್ಯುತ್ತಮ ಸಿನಿಮಾಗಳನ್ನು ಕೊಡಬಹದು ಎಂಬ ಭರವಸೆ ಕೊಟ್ಟಿದ್ದು ಚಾರ್ಲಿ. ಐದು ವರ್ಷಗಳ ಶ್ರಮ, ಸಿನಿಮಾ ಪ್ರೀತಿ, ಸೂಕ್ಷ್ಮ ಅವಲೋಕನ ಮತ್ತು ನನಗೆ ಅನಿಸಿದ್ದನ್ನೇ ಮಾಡುತ್ತೇನೆ ಎಂಬ ಸ್ಪಷ್ಟತೆ ಕಾಸರಗೋಡಿನ ಈ ಹುಡುಗನನ್ನು ತುಂಬಾ ಎತ್ತರಕ್ಕೆ ಕರೆದುಕೊಂಡು ಹೋಗಲಿಕ್ಕಿದೆ ಅನಿಸಿತು. ರಕ್ಷಿತ್ ಅಭಿನಯ ಮತ್ತು ಚಾರ್ಲಿ ಎಂಬ ನಾಯಿ ತಂದ ಜೀವಂತಿಕೆ ಜೊತೆ ಮನಸ್ಸು ತಟ್ಟುವ ಸಂಭಾಷಣೆ ಈ ಸಿನಿಮಾದ ಪ್ಲಸ್ ಪಾಯಿಂಟ್ಸ್.

     ಜಗತ್ತಿನಾದ್ಯಂತ ಕನ್ನಡ ಸಿನಿಮಾ ಸದ್ದು ಮಾಡುತ್ತಿರುವ ಹೆಮ್ಮೆಯ ಸಂದರ್ಭದಲ್ಲಿ ಪ್ರಾಮಾಣಿಕವಾದ ಕತೆಯಿಂದ ಚಾರ್ಲಿ ನಮ್ಮ ಸಂತೋಷವನ್ನು ಹೆಚ್ಚು ಮಾಡೋದಕ್ಕಿದೆ. ಅಭಿನಂದನೆಗಳು. ಮೊದಲ ಸಿನಿಮಾದಲ್ಲೇ ಎಲ್ಲವನ್ನೂ ಸರಿಯಾಗಿ ಮಾಡಿಬಿಟ್ಟರೆ ಮುಂದಿನ ಸಿನಿಮಾದಲ್ಲಿ ಏನು ಮಾಡ್ತೀರಿ ಕಿರಣ್ ರಾಜ್? ಎಂದು ಪರಮೇಶ್ವರ್ ಗುಂಡ್ಕಲ್ 777 ಚಾರ್ಲಿ ಸಿನೆಮಾದ ಬಗ್ಗೆ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.