Fake Website: ಕಾಂಗ್ರೆಸ್​ ಹೆಸರಲ್ಲಿ ನಕಲಿ ವೆಬ್​ಸೈಟ್​ – ನಾಲ್ವರ ಬಂಧನ, ಓರ್ವ ನಾಪತ್ತೆ – ಓಡಿಹೋದವನಿಗೆ BJP ನಂಟು

ಕರ್ನಾಟಕ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್​ ಪಕ್ಷದ ಹೆಸರಲ್ಲಿ ನಕಲಿ ವೆಬ್​ಸೈಟ್​​ ಸೃಷ್ಟಿಸಿ ಆಗ ವಿರೋಧ ಪಕ್ಷದ ನಾಯಕರಾಗಿದ್ದ ಸಿದ್ದರಾಮಯ್ಯ ಮತ್ತು ಕೆಪಿಸಿಸಿ ಅಧ್ಯಕ್ಷ ಡಿ ಕೆ ಶಿವಕುಮಾರ್​ ಒಳಗೊಂಡಂತೆ ಕಾಂಗ್ರೆಸ್​ ನಾಯಕರ ವಿರುದ್ಧ ಅವಹೇಳನಕಾರಿ ಮಾಹಿತಿಗಳನ್ನು ಪ್ರಕಟಿಸಿದ್ದ ಪ್ರಕರಣ ಸಂಬಂಧ ನಾಲ್ವರನ್ನು ಬಂಧಿಸಲಾಗಿದೆ.

ಬೆಂಗಳೂರು ಮತ್ತು ಹಾಸನದಲ್ಲಿ ಕೈಗೊಂಡ ದಾಳಿಯಲ್ಲಿ  ವೆಟ್​ ಫ್ಯಾಬ್​ ಟೆಕ್ನಾಲಜೀಸ್​ ಪ್ರೈವೇಟ್​ ಲಿಮಿಟೆಡ್​ ಕಂಪನಿಯ ಮೂವರು ನಿರ್ದೇಶಕರು ಮತ್ತು ಓರ್ವ ಉದ್ಯೋಗಿಯನ್ನು ಬಂಧಿಸಲಾಗಿದೆ.

ಮೂರು ಮೊಬೈಲ್​ ಫೋನ್​, ಒಂದು ಲ್ಯಾಪ್​ಟ್ಯಾಪ್​ ಮತ್ತು ಕೆಲವು ಅವಹೇಳನಕಾರಿ ದಾಖಲೆಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ವೆಬ್​ಸೈಟ್​ ನಿರ್ಮಾಣಕ್ಕಾಗಿ ಹಣ ಸಂದಾಯ ಮಾಡಿದ್ದ ಧರಣೇಶ್​​ ಜೈನ್​ ಮತ್ತು ನಕಲಿ ಐಡಿ ಸೃಷ್ಟಿಸಿ ಕಾಂಗ್ರೆಸ್​ ಪಕ್ಷದ ಹೆಸರಲ್ಲಿ ನಕಲಿ ವೆಬ್​ಸೈಟ್​ ಅಭಿವೃದ್ಧಿಪಡಿಸಿದ್ದ ಸಿದ್ಧಾರ್ಥ್​ ಮತ್ತು ವೆಂಕಟೇಶ್​ ಎಂಬ ಮೂವರನ್ನು ಬಂಧಿಸಲಾಗಿದೆ.

ಬಿಜೆಪಿ ನಂಟು:

ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿ ಪಕ್ಷದ ಪರವಾಗಿ ರಣತಂತ್ರಗಳನ್ನು ರೂಪಿಸುತ್ತಿದ್ದ ವರಾಹಿ ಎನಾಲಿಟಿಕಲ್​ ಕಂಪನಿಯ ಹಾಸನ ಮೂಲದ ಶಶಾಂಕ್​ ಭಾರಧ್ವಜ್​ ಓಡಿಹೋಗಿದ್ದು, ಈತನಿಗಾಗಿ ಪೊಲೀಸರು ಹುಡುಕಾಟ ನಡೆಸುತ್ತಿದ್ದಾರೆ.

ಕರ್ನಾಟಕ ಕಾಂಗ್ರೆಸ್​ ಘಟಕದ ಹೆಸರಲ್ಲಿ ನಕಲಿ ವೆಬ್​ಸೈಟ್​ ಸಂಬಂಧ ಫೆಬ್ರವರಿ ಮೂರರಂದು ಕೆಪಿಸಿಸಿ ಕಾನೂನು ಘಟಕ ದೂರನ್ನು ನೀಡಿತ್ತು. ಈ ದೂರು ಆಧರಿಸಿ ಮಾಹಿತಿ ತಂತ್ರಜ್ಞಾನ ಕಾಯ್ದೆ ಕಲಂ 66 (ಸಿ) ಮತ್ತು 66 (ಡಿ) ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿತ್ತು.

ನಕಲಿ ವೆಬ್​ಸೈಟ್​ಗಾಗಿ ಶಶಾಂಕ್​ ಭಾರಧ್ವಜ್​ 25 ಸಾವಿರ ರೂಪಾಯಿ ಹಣ ಸಂದಾಯ ಮಾಡಿದ್ದ ಮತ್ತು ಕಮಿಷನ್​ ಪಡೆದಿದ್ದ.