BIG BREAKING: ಕರ್ನಾಟಕ ಚುನಾವಣೆ: ಕಾಂಗ್ರೆಸ್​​ ಪಕ್ಷದ ಹೆಸರಲ್ಲಿ ನಕಲಿ ವೆಬ್​ಸೈಟ್​, ಅಸಲಿ ವೆಬ್​ಸೈಟ್​ ಮಾಯ..!

ವಿಧಾನಸಭಾ ಚುನಾವಣೆ ಹತ್ತಿರವಾಗುತ್ತಿರುವ ಹೊತ್ತಲ್ಲೇ ಕರ್ನಾಟಕ ಪ್ರದೇಶ ಕಾಂಗ್ರೆಸ್​ ಸಮಿತಿ ಹೆಸರಲ್ಲೇ ನಕಲಿ ವೆಬ್​ಸೈಟ್​​ವೊಂದನ್ನು ತೆರೆಯಲಾಗಿದೆ. ಅಂದಹಾಗೆ ಇದು ಕರ್ನಾಟಕ ಕಾಂಗ್ರೆಸ್​ ಪಕ್ಷದ ಅಧಿಕೃತ ವೆಬ್​ಸೈಟ್​ ಅಲ್ಲ.

ಕರ್ನಾಟಕ ಪ್ರದೇಶ ಕಾಂಗ್ರೆಸ್​ ಸಮಿತಿ ಬಗ್ಗೆ ಮಾಹಿತಿ ಇರುವ ಅಧಿಕೃತ ವೆಬ್​ಸೈಟ್​ inckarnataka.in. ಈ ಅಧಿಕೃತ ವೆಬ್​ಸೈಟ್​ನ್ನು ಈಗ ತೆಗೆದುಹಾಕಲಾಗಿದೆ.

ಬದಲಿಗೆ ಕಾಂಗ್ರೆಸ್​ ವೆಬ್​ಸೈಟ್​​ನ್ನೇ ಹೋಲುವ ನಕಲಿ ವೆಬ್​ಸೈಟ್​. ಈ ನಕಲಿ ವೆಬ್​ಸೈಟ್​ನ ಲಿಂಕ್​ kpcc.in ಕರ್ನಾಟಕ ಪ್ರದೇಶ ಕಾಂಗ್ರೆಸ್​ communal, criminal, corrupt ಎಂಬ ಮೂರು ಪದಗಳನ್ನು ಬಳಸಿ ಆ ಶೀರ್ಷಿಕೆಗಳ ಕೆಳಗೆ ಸಿದ್ದರಾಮಯ್ಯ, ಡಿಕೆಶಿವಕುಮಾರ್​ ಮತ್ತು ಕೆ ಜೆ ಜಾರ್ಜ್​ ಫೋಟೋ ಬಳಸಲಾಗಿದೆ.

ಈ ನಕಲಿ ವೆಬ್​ಸೈಟ್​ ವಿರುದ್ಧ ತನಿಖೆ ಕೈಗೊಳ್ಳುವಂತೆ ಕಾಂಗ್ರೆಸ್​ ಶಾಸಕ ಮತ್ತು ಮಾಜಿ ಸಚಿವ ಪ್ರಿಯಾಂಕ್​ ಖರ್ಗೆ ಅವರು ಬೆಂಗಳೂರು ಪೊಲೀಸ್​ ಆಯುಕ್ತ ಪ್ರತಾಪ್​ಚಂದ್ರ ರೆಡ್ಡಿ ಅವರಿಗೆ ದೂರು ನೀಡಿದ್ದಾರೆ.

ಈ ನಕಲಿ ವೆಬ್​​ಸೈಟ್​​ನಲ್ಲಿ ಬೆಂಗಳೂರಿನ ಕ್ವೀನ್ಸ್​​ ರಸ್ತೆಯಲ್ಲಿ ಪಕ್ಷದ ರಾಜ್ಯ ಘಟಕದ ಮುಖ್ಯ ಕಚೇರಿಯ ವಿಳಾಸ ಮತ್ತು ಕಾಂಗ್ರೆಸ್​ ಪಕ್ಷದ ಅಧಿಕೃತ ಕಚೇರಿಯ ದೂರವಾಣಿ ಸಂಖ್ಯೆಯನ್ನೇ ನೀಡಲಾಗಿದೆ.

ಈ ನಕಲಿ ವೆಬ್​ಸೈಟ್​ನಲ್ಲಿ ಕಾಂಗ್ರೆಸ್ ವಿರುದ್ಧದ ಭ್ರಷ್ಟಾಚಾರ, ಅಕ್ರಮ, ಕೋಮುಗಲಭೆಗಳು, ತುಕುಡೆ ತುಕುಡೆ ಗ್ಯಾಂಗ್​ ಆರೋಪಗಳು, ಡಿಕೆಶಿವಕುಮಾರ್​ ತಿಹಾರ್ ಜೈಲಿಗೆ ಹೋದ ಅಂಶಗಳನ್ನೆಲ್ಲ ಪ್ರಕಟಿಸಲಾಗಿದೆ.

ಈ ವೆಬ್​ಸೈಟ್​ನ ಮುಖಪುಟದಲ್ಲಿ ಸಿದ್ದರಾಮಯ್ಯ, ಡಿಕೆಶಿವಕುಮಾರ್​ ಮತ್ತು ಮಾಜಿ ಸಚಿವ ಕೆ ಜೆ ಜಾರ್ಜ್​ ಅವರ ಪೋಟೋವನ್ನು ಬಳಸಲಾಗಿದೆ.

ಅಧ್ಯಕ್ಷರು ಎಂಬ ಒಕ್ಕಣೆಯಲ್ಲಿ ಡಿಕೆಶಿವಕುಮಾರ್​ ತಿಹಾರ್​ ಜೈಲಿನಲ್ಲಿದ್ದ ಮಾಹಿತಿಯನ್ನು ಪ್ರಕಟಿಸಲಾಗಿದೆ.

ತಿಹಾರ್​ ಜೈಲಿನ ಎದುರುಗಡೆ ಸೋನಿಯಾ ಗಾಂಧಿ, ರಾಹುಲ್​ ಗಾಂಧಿ, ಸಿದ್ದರಾಮಯ್ಯ, ಡಿಕೆಶಿವಕುಮಾರ್​ ಮತ್ತು ಮಲ್ಲಿಕಾರ್ಜುನ ಖರ್ಗೆ ಇರುವ ಫೋಟೋವನ್ನು ಅಂಟಿಸಲಾಗಿದೆ.

ಮಾದರಿ ಅಭ್ಯರ್ಥಿಗಳ ​ಪಟ್ಟಿಯಲ್ಲಿ ಡಿಕೆಶಿವಕುಮಾರ್​, ಮೊಹಮ್ಮದ್​ ನಲಪಾಡ್​, ವಿನಯ ಕುಲಕರ್ಣಿ, ಕೆ ಜೆ ಜಾರ್ಜ್​ ಮತ್ತು ರಮೇಶ್​ ಕುಮಾರ್​ ಅವರ ಫೋಟೋವನ್ನು ಹಾಕಲಾಗಿದೆ.

ಈ ನಕಲಿ ವೆಬ್​ಸೈಟ್​ ವಿರುದ್ದ ಕ್ರಮಕೈಗೊಳ್ಳುವಂತೆ ಪೊಲೀಸ್​ ಆಯುಕ್ತರಿಗೆ ದೂರು ನೀಡಲಾಗಿದೆ.