BREAKING: ಪರಿಷತ್​ನ 3 ಸ್ಥಾನಗಳಿಗೆ ಉಪ ಚುನಾವಣೆ ಘೋಷಣೆ

ಕರ್ನಾಟಕ ವಿಧಾನಸಭೆಯಿಂದ ವಿಧಾನಪರಿಷತ್​ಗೆ ಮೂರು ಸ್ಥಾನಗಳಿಗೆ ಉಪ ಚುನಾವಣೆ ಘೋಷಣೆ ಆಗಿದೆ. 

ಭಾರತದ ಚುನಾವಣಾ ಆಯೋಗ ಚುನಾವಣಾ ದಿನಾಂಕ ಪ್ರಕಟಿಸಿದೆ.

ಇದೇ ತಿಂಗಳ ಅಂದ್ರೆ ಜೂನ್​ 30ರಂದು ಮತದಾನ ನಡೆಯಲಿದ್ದು, ಅವತ್ತೇ ಚುನಾವಣಾ ಫಲಿತಾಂಶ ಪ್ರಕಟವಾಗಲಿದೆ.

ಲಕ್ಷ್ಮಣ ಸವದಿ, ಬಾಬುರಾವ್​ ಚಿಂಚನಸೂರು ಮತ್ತು ಆರ್​ ಶಂಕರ್​ ಅವರ ರಾಜೀನಾಮೆಯಿಂದ ಪರಿಷತ್​ ಸ್ಥಾನ ಖಾಲಿಯಾಗಿತ್ತು.

ಈ ಮೂವರು ಬಿಜೆಪಿಗೆ ರಾಜೀನಾಮೆ ಕೊಟ್ಟು ಕಾಂಗ್ರೆಸ್​ಗೆ ಸೇರ್ಪಡೆಯಾಗಿದ್ದರು.

ಜೂನ್​ 13ರಂದು ಉಪ ಚುನಾವಣೆಗೆ ಅಧಿಸೂಚನೆ ಪ್ರಕಟವಾಗಲಿದೆ. ನಾಮಪತ್ರ ಸಲ್ಲಿಕೆಗೆ ಜೂನ್​ 20 ನಾಮಪತ್ರ ಸಲ್ಲಿಕೆಗೆ ಕೊನೆಯ ದಿನ. ಜೂನ್​ 21ರಂದು ನಾಮಪತ್ರ ಪರಿಶೀಲನೆ ನಡೆಯಲಿದೆ. ಜೂನ್​ 23 ನಾಮಪತ್ರ ವಾಪಸ್​ಗೆ ಕೊನೆಯ ದಿನ.

ಜೂನ್​ 30ರಂದು ಬೆಳಗ್ಗೆ 9ರಿಂದ ಸಂಜೆ 4 ಗಂಟೆಯವರೆಗೆ ಶಾಸಕರು ಮತದಾನ ಮಾಡಲಿದ್ದಾರೆ.

ಬಾಬುರಾವ್​ ಚಿಂಚನಸೂರು ಅವರ ಸದಸ್ಯತ್ವ ಅವಧಿ 2024ರ ಜೂನ್​ 17ಕ್ಕೆ, ಆರ್​ ಶಂಕರ್​ ಜೂನ್​ 30, 2026ಕ್ಕೆ ಮತ್ತು ಲಕ್ಷ್ಮಣ ಸವದಿ ಸದಸ್ಯತ್ವ ಅವಧಿ ಜೂನ್​ 14, 2028ಕ್ಕೆ ಮುಗಿಯಬೇಕಿತ್ತು.

ಆದರೆ ಕಾಂಗ್ರೆಸ್​ನಿಂದ ವಿಧಾನಸಭಾ ಚುನಾವಣೆಗೆ  ಸ್ಪರ್ಧಿಸುವ ಸಲುವಾಗಿ ಎಂಎಲ್​ಸಿ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು.

ಇವರಲ್ಲಿ ಸವದಿ ಮಾತ್ರ ಅಥಣಿ ವಿಧಾನಸಭಾ ಕ್ಷೇತ್ರದಿಂದ ಆಯ್ಕೆ ಆಗಿದ್ದರು. ಗುರುಮಿಟ್ಕಲ್​ನಿಂದ ಸ್ಪರ್ಧಿಸಿದ್ದ ಚಿಂಚನಸೂರು ಸೋತಿದ್ದರು.