Bengaluru: ಕೇರಳದಲ್ಲಿ ಲಂಚ ಸ್ವೀಕಾರ – ಬೆಂಗಳೂರಿನ ನಾಲ್ವರು ಪೊಲೀಸ್​ ಅಧಿಕಾರಿಗಳ ಅಮಾನತು

ಲಂಚ ಸ್ವೀಕರಿಸಲು ಹೋಗಿ ಕೇರಳದಲ್ಲಿ ಸಿಕ್ಕಿಬಿದ್ದ ಬೆಂಗಳೂರಿನ ನಾಲ್ವರು ಪೊಲೀಸರನ್ನು ಅಮಾನತು ಮಾಡಲಾಗಿದೆ.

ಇನ್ಸ್​ಪೆಕ್ಟರ್​ ಶಿವಪ್ರಕಾಶ್​, ಮುಖ್ಯ ಕಾನ್ಸ್​ಸ್ಟೇಬಲ್​ ವಿಜಯ್​ಕುಮಾರ್​, ಶಿವಾನಿ, ಕಾನ್ಸ್​ಸ್ಟೇಬಲ್​ ಸಂದೇಶ್​ ಅಮಾನತ್ತಾಗಿದ್ದಾರೆ. ಅಮಾನತ್ತಾದವರೆಲ್ಲರೂ ವೈಟ್​ಫೀಲ್ಡ್​ ಠಾಣೆಯವರು.

ಎಸಿಪಿ ವರದಿ ಆಧರಿಸಿ ನಾಲ್ವರನ್ನೂ ಅಮಾನತು ಮಾಡಿ ಬೆಂಗಳೂರು ನಗರ ಪೊಲೀಸ್​ ಆಯುಕ್ತ ದಯಾನಂದ ಬಿ ಅವರು ಆದೇಶ ಹೊರಡಿಸಿದ್ದಾರೆ.

ಉದ್ಯೋಗ ಕೊಡಿಸುವ ನೆಪದಲ್ಲಿ ಸಾಫ್ಟ್​ವೇರ್​ ಎಂಜಿನಿಯರ್‌ ಚಂದಕ್‌ ಶ್ರೀಕಾಂತ್‌ ಎನ್ನುವವರಿಗೆ ಆನ್​ಲೈನ್​ ಮೂಲಕ 26 ಲಕ್ಷ ರೂಪಾಯಿ ವಂಚನೆ ಮಾಡಲಾಗಿತ್ತು. 

ಈ ಸಂಬಂಧ ಜೂನ್​ 14ರಂದು ವೈಟ್​ಫೀಲ್ಡ್​​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಪ್ರಕರಣದ ತನಿಖೆ ನಡೆಸುತ್ತಿದ್ದ ಇನ್ಸ್​ಪೆಕ್ಟರ್​ ಶಿವಪ್ರಕಾಶ್​ ತಂಡ ಕೇರಳಕ್ಕೆ ತೆರಳಿ ಪರೇಶ್​ ಮತ್ತು ನಿಶಾಂತ್​ ಎಂಬ ಇಬ್ಬರನ್ನು ವಶಕ್ಕೆ ಪಡೆದು ವಿಚಾರಣೆಗೊಳಪಡಿಸಿತ್ತು. ಇವರಿಬ್ಬರ ಮಾಹಿತಿ ಆಧರಿಸಿ ಸೋಮವಾರ ಎರ್ನಾಕುಲಂನಲ್ಲಿ ನಿಖಿಲ್​ ಮತ್ತು ಅಖಿಲ್​ನನ್ನು ಬಂಧಿಸಿತ್ತು.

ಆದರೆ ಬಂಧಿತ ಅಖಿಲ್​ನ್ನು ಬಿಡುಗಡೆಗೊಳಿಸಲು ಇನ್ಸ್​ಪೆಕ್ಟರ್​ ಶಿವಪ್ರಕಾಶ್​ ತಂಡ 3 .96 ಲಕ್ಷ ರೂಪಾಯಿ ಬೇಡಿಕೆ ಇಟ್ಟಿತ್ತು. ಲಂಚ ಬೇಡಿಕೆ ಸಂಬಂಧ ಅಖಿಲ್​ ಪರ ವಕೀಲರು ಕೇರಳ ಪೊಲೀಸರಿಗೆ ದೂರು ನೀಡಿದ್ದರು. 

ವೈಟ್​ಫೀಲ್ಡ್​ ಪೊಲೀಸರ ಕಾರಿನಲ್ಲಿ 3 ಲಕ್ಷ ರೂಪಾಯಿ ಪತ್ತೆಯಾಗಿತ್ತು. ಉಳಿದ ಮೊತ್ತವನ್ನು ಸ್ವೀಕರಿಸುವ ವೇಳೆ ವೈಟ್​ಫೀಲ್ಡ್​ ಪೊಲೀಸರ ತಂಡ ಕೇರಳ ಪೊಲೀಸರ ಕೈಗೆ ಸಿಕ್ಕಿಬಿದ್ದಿದೆ.