ಬೆಂಗಳೂರು-ಮೈಸೂರು ಎಕ್ಸ್​​ಪ್ರೆಸ್​ ವೇ – ಕ್ಯಾಮರಾ ನೋಡ್ತಿರುತ್ತೆ ಎಚ್ಚರ – ಮನೆ ಬಾಗಿಲಿಗೆ ಬರುತ್ತೆ ನೋಟಿಸ್​

ಬೆಂಗಳೂರು ಮತ್ತು ಮೈಸೂರು (Bengaluru-Mysuru Expressway) ಎಕ್ಸ್​​ಪ್ರೆಸ್​​ ವೇನಲ್ಲಿ ಪ್ರಯಾಣಿಸುವ ವಾಹನ ಸವಾರರೇ ಎಚ್ಚರ. ಎಕ್ಸ್​ಪ್ರೆಸ್​​ವೇನಲ್ಲಿ ಸಂಚಾರಿ ನಿಯಮ ಉಲ್ಲಂಘನೆ ಮಾಡಿದ್ರೆ ನೀವು ಕ್ಯಾಮರಾ ಕಣ್ಣಿಗೆ ಬೀಳ್ತೀರಿ, ನಿಮ್ಮ ಮನೆ ಬಾಗಿಲಿಗೆ ಟ್ರಾಫಿಕ್​ ಪೊಲೀಸರು ದಂಡ ಪಾವತಿಸುವಂತೆ ನೋಟಿಸ್​ ಕಳಿಸ್ತಾರೆ.

ಬೆಂಗಳೂರು-ಮೈಸೂರು ಎಕ್ಸ್​ಪ್ರೆಸ್​ ವೇನಲ್ಲಿ ಆರ್ಟಿಫಿಶಿಯಲ್​ ಇಂಟೆಲಿಜೆನ್ಸ್​ ಕ್ಯಾಮರಾ ತಂತ್ರಜ್ಞಾನವನ್ನು ಬಳಸಿ ಸಂಚಾರಿ ನಿಯಮಗಳ ಉಲ್ಲಂಘನೆಗೆ ದಂಡ ಹಾಕಲಾಗುತ್ತಿದೆ ಮತ್ತು ದಂಡ ಕಟ್ಟುವಂತೆ ವಾಹನ ಮಾಲೀಕರಿಗೆ ನೋಟಿಸ್​ ನೀಡಲಾಗುತ್ತಿದೆ.

ಪೊಲೀಸ್​ ಇಲಾಖೆ (Karnataka Police) ಮಾಹಿತಿ ಪ್ರಕಾರ ಮೇ 1ರಿಂದ ಮೇ 15ರವರೆಗೆ ಕೇವಲ 15 ದಿನದಲ್ಲಿ ಎಕ್ಸ್​ಪ್ರೆಸ್​ವೇನಲ್ಲಿ ಸಂಚಾರಿ ನಿಯಮ (Traffic Rules) ಉಲ್ಲಂಘಿಸಿದ 12,192 ಮಂದಿಗೆ ದಂಡ ಹಾಕಲಾಗಿದೆ.

ಎಕ್ಸ್​ಪ್ರೆಸ್​ ವೇನಲ್ಲಿ ಮೊಬೈಲ್​ ಮಾತಾಡ್ಕೊಂಡು ಚಾಲನೆ ಮಾಡ್ತಿದ್ದ ಕೆಎಸ್​ಆರ್​ಟಿಸಿ (KSRTC) ಬಸ್​ ಚಾಲಕರಿಗೂ ನೋಟಿಸ್​ ಕಳುಹಿಸಲಾಗಿದೆ.

ಎಕ್ಸ್​ಪ್ರೆಸ್​ ವೇನಲ್ಲಿ ಗಂಟೆಗೆ 100 ಕಿಲೋ ಮೀಟರ್​ಗಿಂತ ಅಧಿಕ ವೇಗದಲ್ಲಿ ಪ್ರಯಾಣಿಸುವಂತಿಲ್ಲ.

ವಾಹನ ಚಾಲನೆ ವೇಳೆ ಮೊಬೈಲ್​ನಲ್ಲಿ (Mobile Phone) ಮಾತಾಡುವುದು, ಮುಂಭಾಗದಲ್ಲಿ ಕೂತವರು ಸೀಟ್​ ಬೆಲ್ಟ್​ (Seat Belt) ಧರಿಸದೇ ಇರುವುದು, ನಿಗದಿಪಡಿಸಿದ ಮಿತಿಗಿಂತ ಅಧಿಕ ವೇಗದಲ್ಲಿ ಚಾಲನೆ, ಲೇನ್​ ಶಿಸ್ತನ್ನು ಕಾಪಾಡಿಕೊಳ್ಳದೇ ಲೇನ್​ ನಿಯಮಗಳ ಉಲ್ಲಂಘನೆ ಹೀಗೆ ಎಲ್ಲ ರೀತಿ ಸಂಚಾರಿ ನಿಯಮಗಳ ಉಲ್ಲಂಘನೆಯನ್ನು ಕ್ಯಾಮರಾದಲ್ಲಿ ಸೆರೆ ಹಿಡಿಯಲಾಗುತ್ತಿದೆ.

ಯಾವ ಸ್ಥಳದಲ್ಲಿ ನಿಯಮ ಉಲ್ಲಂಘನೆ ಮಾಡಲಾಗಿದೆ, ಎಷ್ಟೊತ್ತಿಗೆ ನಿಯಮ ಉಲ್ಲಂಘನೆ ಮಾಡಲಾಗಿದೆ, ಯಾವ ನಿಯಮ ಉಲ್ಲಂಘಿಸಲಾಗಿದೆ ಮತ್ತು ಆ ನಿಯಮ ಉಲ್ಲಂಘಿಸಿದ್ದಕ್ಕೆ ದಂಡದ ಮೊತ್ತ ಎಷ್ಟು ಎಂಬ ಮಾಹಿತಿಯನ್ನು ನೋಟಿಸ್​ನಲ್ಲಿ ನೀಡಲಾಗುತ್ತದೆ.

ಕ್ಯಾಮರಾದಲ್ಲಿ ಸೆರೆಯಾಗುವ ವಾಹನದ ನೋಂದಣಿ ಸಂಖ್ಯೆ ಆಧರಿಸಿ ವಾಹನ ಮಾಲೀಕರಿಗೆ ದಂಡ ವಿಧಿಸಲಾಗುತ್ತದೆ.

ನೋಟಿಸ್​ ಕಳುಹಿಸಿದ 7 ದಿನಗಳ ಒಳಗಾಗಿ ದಂಡ ಪಾವತಿ ಮಾಡ್ಬೇಕು. ಇಲ್ಲವಾದ್ರೆ ಗರಿಷ್ಠ 6 ತಿಂಗಳ ಜೈಲು ಶಿಕ್ಷೆ ಅಥವಾ 5 ಸಾವಿರ ರೂಪಾಯಿ ದಂಡ ವಿಧಿಸಲಾಗಿದೆ.