BREAKING: ಪ್ರಧಾನಿ ಮೋದಿ ವಿರುದ್ಧ ಭಿತ್ತಿಪತ್ರ – 100 ಎಫ್​ಐಆರ್​ ದಾಖಲು, 6 ಮಂದಿ ಬಂಧನ

ಪ್ರಧಾನಿ ನರೇಂದ್ರ ಮೋದಿ ವಿರುದ್ಧ ಭಿತ್ತಿಪತ್ರಗಳನ್ನು ಅಂಟಿಸಿದ ಆರೋಪದಡಿಯಲ್ಲಿ 100 ಎಫ್​ಐಆರ್​ಗಳನ್ನು ದಾಖಲಿಸಿಕೊಂಡಿರುವ ದೆಹಲಿ ಪೊಲೀಸರು ಆರು ಮಂದಿಯನ್ನು ಬಂಧಿಸಿದ್ದಾರೆ.

ಬಂಧಿತರಲ್ಲಿ ಭಿತ್ತಿಪತ್ರಗಳನ್ನು ಮುದ್ರಿಸಿದ ಮುದ್ರಣ ಸಂಸ್ಥೆಯ ಇಬ್ಬರು ಮಾಲೀಕರು ಸೇರಿದ್ದಾರೆ. ಭಿತ್ತಿಪತ್ರಗಳನ್ನು ವ್ಯಾನ್​ನಲ್ಲಿ ಸಾಗಿಸ್ತಿದ್ದ ಓರ್ವನನ್ನು ಬಂಧಿಸಲಾಗಿದೆ. ಜೊತೆಗೆ ಭಿತ್ತಿಪತ್ರ ಸಾಗಿಸ್ತಿದ್ದ ವ್ಯಾನ್​ನ್ನೂ ವಶಕ್ಕೆ ಪಡೆಯಲಾಗಿದೆ.

ರಾಜಧಾನಿ ದೆಹಲಿಯ ಹಲವು ಕಡೆಗಳಲ್ಲಿ ಮೋದಿ ತೊಲಗಿಸಿ, ದೇಶ ಉಳಿಸಿ ಭಿತ್ತಿಪತ್ರವನ್ನು ಅಂಟಿಸಲಾಗಿತ್ತು. 2 ಸಾವಿರ ಭಿತ್ತಿಪತ್ರಗಳನ್ನು ತೆಗೆಯಲಾಗಿದೆ ಮತ್ತು 2 ಸಾವಿರ ಭಿತ್ತಿಪತ್ರವನ್ನು ವಶಕ್ಕೆ ಪಡೆಯಲಾಗಿದೆ.

ಸಾರ್ವಜನಿಕ ಸ್ವತ್ತನ್ನು ವಿರೂಪಗೊಳಿಸಿದ ಆರೋಪ ಮತ್ತು ಮುದ್ರಿಸಲಾದ ಭಿತ್ತಿಪತ್ರದಲ್ಲಿ ಮುದ್ರಣ ಸಂಸ್ಥೆಯ ಹೆಸರನ್ನು ನಮೂದು ಮಾಡದೇ ಇರುವ ಹಿನ್ನೆಲೆಯಲ್ಲಿ ಪ್ರೆಸ್​ ರಿಜಿಸ್ಟ್ರೇಷನ್​ ಮತ್ತು ಬುಕ್ಸ್​ ಕಾಯ್ದೆಯಡಿ ಎಫ್​ಐ ಆರ್​ ದಾಖಲಿಸಿಕೊಳ್ಳಲಾಗಿದೆ.

ಆಮ್​ ಆದ್ಮಿ ಪಕ್ಷದ ರಣತಂತ್ರ:

ಮಾಹಿತಿಗಳ ಪ್ರಕಾರ ಎರಡು ಮುದ್ರಣ ಸಂಸ್ಥೆಗಳಿಗೆ ಮೋದಿ ವಿರುದ್ಧದ 50 ಸಾವಿರ ಭಿತ್ತಿಪತ್ರಗಳನ್ನು ಮುದ್ರಿಸುವಂತೆ ಹೇಳಲಾಗಿತ್ತು.

ದೆಹಲಿಯಲ್ಲಿ ಆಡಳಿತದಲ್ಲಿರುವ ಆಮ್​ ಆದ್ಮಿ ಪಕ್ಷ ಈ ಭಿತ್ತಿಪತ್ರಗಳನ್ನು ಮುದ್ರಿಸಲು ಹೇಳಿತ್ತು ಮತ್ತು ಇವುಗಳನ್ನು ಆಪ್​ನ ಮುಖ್ಯ ಕಚೇರಿಗೆ ಸಾಗಿಸಲಾಗ್ತಿತ್ತು ಎಂದು ಬಂಧಿತರು ಮಾಹಿತಿ ನೀಡಿದ್ದಾರೆ.

ಎರಡು ವರ್ಷ ಹಿಂದೆಯೂ:

ಕೋವಿಡ್​ ಲಸಿಕೆ ಅಭಿಯಾನದಲ್ಲಿ ಪ್ರಧಾನಿ ನರೇಂದ್ರ ಮೋದಿ ವಿರುದ್ಧ ದೆಹಲಿಯಲ್ಲಿ 2021ರಲ್ಲೂ ಇದೇ ರೀತಿ ಭಿತ್ತಿಪತ್ರಗಳನ್ನು ಅಂಟಿಸಲಾಗಿತ್ತು. ಆಗ 19 ವರ್ಷದ ಯುವಕ, ಆಟೋ ಚಾಲಕ ಒಳಗೊಂಡಂತೆ 22 ಮಂದಿಯನ್ನು ದೆಹಲಿ ಪೊಲೀಸರು ಬಂಧಿಸಿದ್ದರು.