ಏಪ್ರಿಲ್​ನಿಂದ ಕರ್ನಾಟಕದಲ್ಲೇ iPhone ಉತ್ಪಾದನೆ – ಜುಲೈ 1ರಂದು ಭೂಮಿ ಹಸ್ತಾಂತರ

ಕರ್ನಾಟಕದಲ್ಲೇ ದುಬಾರಿ ಬೆಲೆಯ ಆ್ಯಪಲ್​ ಕಂಪನಿಯ ಐಫೋನ್​ ತಯಾರಾಗಬೇಕೆಂಬ ಬಹು ವರ್ಷಗಳ ಪ್ರಯತ್ನ ಈಡೇರಿದ್ದು, ಮುಂದಿನ ತಿಂಗಳು ಅಂದರೆ ಜುಲೈ 1ರಂದು ಸಿಎಂ ಸಿದ್ದರಾಮಯ್ಯ ಅವರ ಸರ್ಕಾರ ಐಫೋನ್​ ತಯಾರಿಕೆಗಾಗಿ ಭೂಮಿಯನ್ನು ಹಸ್ತಾಂತರ ಮಾಡಲಿದೆ.

ಮುಂದಿನ ವರ್ಷದ ಏಪ್ರಿಲ್​ ವೇಳೆಗೆ ಕರ್ನಾಟಕದಲ್ಲೇ ಉತ್ಪಾದಿಸಿದ ಐಫೋನ್​ ಮಾರುಕಟ್ಟೆಗೆ ಬಿಡುಗಡೆ ಆಗಲಿದೆ.

ಈ ಯೋಜನೆಗೆ ಪ್ರಾಜೆಕ್ಟ್​ ಎಲಿಫೆಂಟ್​ ಎಂದು ಹೆಸರಿಡಲಾಗಿದೆ.

ಇವತ್ತು ಬೆಂಗಳೂರಲ್ಲಿ ಬೃಹತ್​ ಮತ್ತು ಮಧ್ಯಮ ಕೈಗಾರಿಕೆ ಸಚಿವ ಎಂಬಿ ಪಾಟೀಲ್​ ಮತ್ತು ಮಾಹಿತಿ ತಂತ್ರಜ್ಞಾನ ಹಾಗೂ ಜೈವಿಕ ತಂತ್ರಜ್ಞಾನ ಸಚಿವ ಪ್ರಿಯಾಂಕ್​ ಖರ್ಗೆ ಅವರ ಜೊತೆಗೆ ತೈವಾನ್​ ಮೂಲದ ಫಾಕ್ಸ್​ಕಾನ್​ ಕಂಪನಿಯ ಪ್ರತಿನಿಧಿಗಳ ಸಭೆ ನಡೆಸಿದರು.

ಏಪ್ರಿಲ್​ನಿಂದಲೇ ಐಫೋನ್​ ತಯಾರಿಕೆ ಆರಂಭ:

ಮುಂದಿನ ವರ್ಷದ ಏಪ್ರಿಲ್​ ವೇಳೆಗೆ ಕರ್ನಾಟಕದಲ್ಲೇ ಉತ್ಪಾದಿಸಿದ ಐಫೋನ್​ ಮಾರುಕಟ್ಟೆಗೆ ಬರಲಿದೆ. ಪ್ರತಿ ವರ್ಷ 2 ಕೋಟಿ ಐಫೋನ್​ ಉತ್ಪಾದನೆ ಗುರಿ ಹೊಂದಲಾಗಿದೆ.

ಹೂಡಿಕೆ:

ತೈವಾನ್​ ಮೂಲದ ಫಾಕ್ಸ್​ಕಾನ್​ಗೆ ಕರ್ನಾಟಕದಲ್ಲಿ ಐಫೋನ್​ ಉತ್ಪಾದನೆಗಾಗಿ 13 ಸಾವಿರ ಕೋಟಿ ರೂಪಾಯಿ ಹೂಡಿಕೆ ಮಾಡಲಿದೆ.

ಉದ್ಯೋಗ ಸೃಷ್ಟಿ:

ಐಫೋನ್​ ಉತ್ಪಾದನಾ ಘಟಕ ಆರಂಭದಿಂದ 50 ಸಾವಿರ ಮಂದಿಗೆ ಉದ್ಯೋಗ ಸಿಗಲಿದೆ. ಉತ್ಪಾದನಾ ಘಟಕಕ್ಕೆ ಬೇಕಾಗುವ ಕೌಶಲ್ಯಾಭಿವೃದ್ಧಿಗಾಗಿ ರಾಜ್ಯ ಸರ್ಕಾರವೇ ತರಬೇತಿ ನೀಡಲಿದೆ.

ಏರ್​ಪೋರ್ಟ್​ ಬಳಿ ಭೂಮಿ ಮಂಜೂರು:

ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಇರುವ ದೇವನಹಳ್ಳಿಯಲ್ಲೇ 300 ಎಕರೆ ಭೂಮಿಯನ್ನು ಹಸ್ತಾಂತರ ಮಾಡಲಾಗುತ್ತದೆ. ಮಾಹಿತಿ ತಂತ್ರಜ್ಞಾನ ಹೂಡಿಕೆ ವಲಯದಲ್ಲಿರುವ ಭೂಮಿಯನ್ನು ಕರ್ನಾಟಕ ಕೈಗಾರಿಕಾ ಪ್ರದೇಶಾಭಿವೃದ್ಧಿ ಮಂಡಳಿ ಹಸ್ತಾಂತರ ಮಾಡಲಿದೆ.

ಈ ಭೂಮಿಗಾಗಿ ಫಾಕ್ಸ್​ಕಾನ್​ ಈಗಾಗಲೇ 90 ಕೋಟಿ ರೂಪಾಯಿ ಠೇವಣಿ ಪಾವತಿಸಿದೆ.

ನೀರಿನ ಲಭ್ಯತೆ: 

ಕಂಪನಿಗೆ 5 ದಶಲಕ್ಷ ಲೀಟರ್​ ನೀರು ಪೂರೈಕೆಗೆ ಸರ್ಕಾರ ಒಪ್ಪಿಕೊಂಡಿದೆ.